រដ្ឋមន្ត្រីការពារជាតិប៉ាគីស្ថានលោក Khawaja M. Asif កាលពីថ្ងៃអាទិត្យ បានព្រមានរដ្ឋាភិបាលលោកខាងលិចថា ការគាំទ្ររបស់ពួកគេចំពោះអ៊ីស្រាអែល បានប្រថុយនឹងការបណ្តោលឲ្យមាន«ផលវិបាកដ៏មហន្តរាយ» ដោយលើកឡើងពីការព្រួយបារម្ភអំពីសមត្ថភាពនុយក្លេអ៊ែររបស់អ៊ីស្រាអែល និងការឈ្លានពានក្នុងតំបន់។

ភាពតានតឹង បានកើនឡើងនៅមជ្ឈិមបូព៌ា បន្ទាប់ពីការវាយលុកតាមអាកាសកាលពីថ្ងៃទី ១៣ ខែមិថុនារបស់អ៊ីស្រាអែលគឺ«ប្រតិបត្តិការតោងើប» ដែលបានកំណត់គោលដៅលើទីតាំងនុយក្លេអ៊ែរ និងយោធារបស់អ៊ីរ៉ង់ តាមសេចក្តីរាយការណ៍បានសម្លាប់មនុស្សជាង ១៣០នាក់ រួមទាំងមេបញ្ជាការយោធាជាន់ខ្ពស់ និងអ្នកវិទ្យាសាស្ត្រនុយក្លេអ៊ែរ។ អ៊ីរ៉ង់បានសងសឹកដោយការវាយប្រហារដោយមីស៊ីល និងយានដ្រូនទៅលើទីក្រុងនានារបស់អ៊ីស្រាអែល ដែលបង្កឲ្យមានការព្រួយបារម្ភនៃជម្លោះកាន់តែធំឡើង។

អ៊ីស្រាអែលត្រូវបានគេជឿជាក់យ៉ាងទូលំទូលាយថា មានអាវុធនុយក្លេអ៊ែរ ប៉ុន្តែរក្សាគោលនយោបាយនៃភាពមិនច្បាស់លាស់ និងមិនមែនជាភាគីនៃសន្ធិសញ្ញាមិនរីកសាយភាយនុយក្លេអ៊ែរ (NPT) នោះទេ។ កិច្ចព្រមព្រៀងឆ្នាំ ១៩៧០ មានគោលបំណងទប់ស្កាត់ការរីករាលដាលអាវុធនុយក្លេអ៊ែរ លើកកម្ពស់ការរំសាយអាវុធ និងធានាការប្រើប្រាស់ដោយសន្តិវិធីនៃបច្ចេកវិទ្យានុយក្លេអ៊ែរ។ ប៉ាគីស្ថានក៏មិនមែនជាប្រទេសហត្ថលេខីរបស់ NPT ដែរ ប៉ុន្តែជារឿយៗគូសបញ្ជាក់ពីការប្តេជ្ញាចិត្តរបស់ខ្លួនចំពោះសុវត្ថិភាពនុយក្លេអ៊ែរ និងគោលការណ៍មិនរីកសាយភាយ តាមរយៈក្របខ័ណ្ឌអន្តរជាតិផ្សេងទៀត។

ក្រុមអ្នកវិភាគព្រមានថា ក្នុងស្ថានភាពជ្រួលច្របល់នាពេលបច្ចុប្បន្ន អាវុធនុយក្លេអ៊ែរដែលមិនបានទទួលស្គាល់របស់អ៊ីស្រាអែល អាចជំរុញឲ្យប្រទេសនេះចាត់វិធានការកាន់តែខ្លាំងក្លា បង្កើនហានិភ័យដែលជម្លោះអាចរីករាលដាលពាសពេញតំបន់ ឬក៏បង្កជាវិបត្តិអន្តរជាតិកាន់តែទូលំទូលាយ។