កងកម្លាំងប្រដាប់អាវុធអ៊ីរ៉ង់ បានផ្សព្វផ្សាយសារនៅលើទូរទស្សន៍ជាតិ ព្រមានឲ្យប្រជាពលរដ្ឋអ៊ីស្រាអែលចាកចេញពីដែនដីកាន់កាប់ប៉ាឡេស្ទីន ស្របពេលដែលប្រទេសទាំង ២ បន្តវាយប្រហារគ្នាទៅវិញទៅមក និងជំរុញឲ្យប្រជាពលរដ្ឋអ៊ីស្រាអែលចាកចេញពីតំបន់ចាំបាច់ សម្រាប់សុវត្ថិភាពរបស់ពួកគេ ។

ខណៈពេលនោះដែរ អ៊ីរ៉ង់ បានប្រាប់ក្រុមអ្នកសម្របសម្រួល កាតា និងអូម៉ង់ ថាខ្លួនមិនបើកចំហរការចរចាបទឈប់បាញ់ជាមួយសហរដ្ឋអាមេរិកទេ ខណៈខ្លួនកំពុងស្ថិតក្រោមការវាយប្រហាររបស់អ៊ីស្រាអែល ។ 

យោធារបស់អ៊ីស្រាអែល ដែលបានបើកការវាយប្រហារកាលពីថ្ងៃសុក្រសប្ដាហ៍មុន ក្នុងគោលបំណងដែលបានបញ្ជាក់ក្នុងការលុបចោលកម្មវិធីនុយក្លេអ៊ែរ និងមីស៊ីលរបស់អ៊ីរ៉ង់ បានព្រមានប្រជាជនអ៊ីរ៉ង់ ដែលរស់នៅក្បែរកន្លែងផលិតអាវុធឲ្យជម្លៀសខ្លួនចេញ ។ 

នៅព្រឹកថ្ងៃចន្ទនេះ កងកម្លាំងអាកាសរបស់អ៊ីស្រាអែល បានវាយប្រហារទីតាំងមីស៊ីលពីដីទៅដី នៅកណ្តាលប្រទេសអ៊ីរ៉ង់។ 

ដោយឡែក លោក Reza Sayad គឺជាអ្នកនាំពាក្យយោធាអ៊ីរ៉ង់ និយាយថា បច្ចុប្បន្នពួកយើងមានទិន្នន័យពេញលេញពីទីតាំងរសើប និងសំខាន់របស់អ្នក និងចំណុចចាំបាច់ ។ ដូច្នេះហើយ ពួកយើងសូមធ្វើការសង្កត់ធ្ងន់ថា ពួកយើងមិនបណ្តោយឲ្យរបបឧក្រិដ្ឋកម្មប្រើប្រាស់អ្នកជាខែលមនុស្សនោះទេ ។ អ្នកត្រូវចាកចេញឆ្ងាយពីទីតាំងដែលបានបញ្ជាក់ ហើយអ្នកត្រូវដឹងថា ការស្នាក់នៅជម្រកក្រោមដី នឹងមិនផ្តល់សន្តិសុខដល់អ្នកនោះទេ ។

លោក Hossein Kermanpour គឺជាអ្នកនាំពាក្យក្រសួងសុខាភិបាលអ៊ីរ៉ង់និយាយថា ចំនួនអ្នកស្លាប់ចាប់តាំងពីចាប់ផ្ដើមការវាយប្រហាររបស់អ៊ីស្រាអែល បានកើនឡើងដល់ ២២៤នាក់ និងមនុស្ស១.២០០នាក់ផ្សេងទៀត រងរបួស ដែលភាគច្រើននៃពួកគេគឺជាជនស៊ីវិល។ ចំណែកនៅក្នុងប្រទេសអ៊ីស្រាអែលវិញ ចំនួនអ្នកស្លាប់ឡើងដល់ ១៤នាក់ ៕