វិមានក្រឹមឡាំងបានប្រាប់ឲ្យដឹងថា ប្រធានាធិបតីរុស្ស៊ី លោក Vladimir Putin និងប្រធានាធិបតីទួរគី លោក Tayyip Erdogan បានថ្កោលទោសចំពោះ «វិធានការប្រើកម្លាំងយោធា» របស់អ៊ីស្រាអែល លើអ៊ីរ៉ង់ ហើយបានអំពាវនាវឲ្យបញ្ឈប់ជាបន្ទាន់នូវអរិភាពនេះ ខណៈដែលមេដឹកនាំទាំង២ ជជែកតាមទូរសព្ទជាមួយគ្នា នាថ្ងៃចន្ទ (ទី១៦ ខែមិថុនា) នេះ។

សេចក្តីថ្លែងការណ៍របស់វិមានក្រឹមឡាំង បានឲ្យដឹងថា៖ «ប្រទេសទាំង២ បានសម្តែងនូវក្ដីបារម្ភយ៉ាងខ្លាំងបំផុត ជុំវិញការកើនឡើងនូវជម្លោះ រវាងអ៊ីរ៉ង់ និងអ៊ីស្រាអែល ដែលបាននាំឲ្យមានចំនួនអ្នកស្លាប់ និងរបួសជាច្រើននាក់រួចហើយ ហើយកំពុងមានផលវិបាកយ៉ាងធ្ងន់ធ្ងររយៈពេលវែង ចំពោះតំបន់ទាំងមូល»។

សេចក្ដីថ្លែងការណ៍បានបន្តថា៖ «មេដឹកនាំទាំង២ បានគាំទ្រឲ្យបញ្ឈប់ជាបន្ទាន់នូវអរិភាព និងដោះស្រាយបញ្ហាដ៏ចម្រូងចម្រាសនានា ក្នុងនោះមានរួមទាំងបញ្ហាទាក់ទងនឹងកម្មវិធីនុយក្លេអ៊ែរអ៊ីរ៉ង់ តាមរយៈមធ្យោបាយនយោបាយ និងការទូតទាំងស្រុង»។

ហើយជាមួយគ្នានេះ សេចក្តីថ្លែងការណ៍នោះបានបញ្ជាក់បន្ថែមថា មេដឹកនាំទាំង២ បានយល់ព្រមលើការបន្តកិច្ចសហប្រតិបត្តិការជិតស្និទ្ធ រវាងប្រទេសទាំង២៕