អ៊ីស្រាអែល និងអ៊ីរ៉ង់ បានបន្តវាយប្រហារគ្នាទៅវិញទៅមករយៈពេលប្រាំថ្ងៃជាប់គ្នានៅថ្ងៃអង្គារ (១៧ មិថុនា) នេះ ហើយប្រធានាធិបតីអាមេរិក លោក Donald Trump បានព្រមានប្រាប់ប្រជាជនអ៊ីរ៉ង់ ឱ្យប្រញាប់ជម្លៀសខ្លួនចេញពីទីក្រុងតេអេរ៉ង់ ដោយលើកឡើងពីអ្វីដែលលោកបាននិយាយថាគឺជាការបដិសេធរបស់ប្រទេសនេះចំពោះកិច្ចព្រមព្រៀងដើម្បីទប់ស្កាត់ការអភិវឌ្ឍអាវុធនុយក្លេអ៊ែរ។

លោក Trump បានសរសេរលើបណ្ដាញសង្គម Truth Social របស់លោកថា៖ «អ៊ីរ៉ង់គួរណាស់តែចុះហត្ថលេខាលើ "កិច្ចព្រមព្រៀង" ដែលរូបលោកបានប្រាប់ពួកគេឱ្យចុះហត្ថលេខា។ ពិតជាអាម៉ាស់ និងខ្ជះខ្ជាយជីវិតមនុស្សណាស់។ និយាយដោយសាមញ្ញបំផុតគឺថា "អ៊ីរ៉ង់មិនអាចមានអាវុធនុយក្លេអ៊ែរទេ"។ អាមេរិកសូមនិយាយដដែលៗម្តងហើយម្តងទៀតថា អ្នកគ្រប់គ្នាគួរតែជម្លៀសចេញទីក្រុងតេអេរ៉ង់ជាបន្ទាន់!»។

ប្រព័ន្ធផ្សព្វផ្សាយអ៊ីរ៉ង់រាយការណ៍ភ្លាមៗថា មានការផ្ទុះ និងការបាញ់ប្រព័ន្ធការពារដែនអាកាសយ៉ាងខ្លាំងក្លានៅទីក្រុងតេអេរ៉ង់ នៅព្រឹកថ្ងៃអង្គារនេះ។ គេហទំព័រព័ត៌មាន Asriran បានរាយការណ៍ថា ប្រព័ន្ធការពារដែនអាកាសក៏ត្រូវបើកដំណើរការផងដែរក្នុងទីក្រុង Natanz ដែលជាជម្រកមូលដ្ឋាននុយក្លេអ៊ែរសំខាន់ៗ មានចម្ងាយ ៣២០គីឡូម៉ែត្រពីរដ្ឋធានី។

នៅអ៊ីស្រាអែល ស៊ីរ៉ែនវាយឆ្មក់តាមអាកាសបន្លឺឡើងនៅក្រុង Tel Aviv បន្ទាប់ពីពាក់កណ្តាលអធ្រាត្រ ហើយសំឡេងផ្ទុះដ៏ធំត្រូវបានលាន់ឮ ខណៈមីស៊ីលអ៊ីរ៉ង់ បន្តវាយប្រហារប្រទេសនេះជាថ្មីម្តងទៀត។ មន្ត្រីអ៊ីរ៉ង់រាយការណ៍ថា មានមនុស្សស្លាប់ប្រមាណ ២២៤នាក់ ដែលភាគច្រើនជាជនស៊ីវិលក្នុងពេល ៥ថ្ងៃមកនេះ ខណៈអ៊ីស្រាអែលនិយាយថា ជនស៊ីវិលប្រហែល ២៤នាក់ត្រូវបានសម្លាប់។ រដ្ឋមន្ត្រីហិរញ្ញវត្ថុអ៊ីស្រាអែល លោក Bezalel Smotrich និយាយថា ប្រជាជនអ៊ីស្រាអែលជិត ៣.០០០នាក់ ត្រូវបានជម្លៀសចេញ ដោយសារតែការខូចខាតពីការវាយប្រហាររបស់អ៊ីរ៉ង់៕