ប្រភពការទូតបារាំងបាននិយាយថា បណ្ដារដ្ឋមន្ត្រីការបរទេសអ៊ឺរ៉ុប បានប្រាប់សមភាគីអ៊ីរ៉ង់របស់ពួកគេ នៅក្នុងកិច្ចសន្ទនាដ៏កម្រមួយកាលថ្ងៃចន្ទ (១៦ មិថុនា) ថាឱ្យត្រលប់ទៅកិច្ចចរចានុយក្លេអ៊ែរជាមួយសហរដ្ឋអាមេរិកវិញ និងដកថយមិនឱ្យមានជម្លោះពេញបន្ទុកកាន់តែក្ដៅជាមួយអ៊ីស្រាអែល ខណៈរដ្ឋមន្ត្រីការបរទេសអ៊ីរ៉ង់បញ្ជាក់ថា អាទិភាពរបស់ក្រុងតេអេរ៉ង់ពេលនេះគឺត្រូវតតាំងនឹងអ៊ីស្រាអែល។

អ៊ីស្រាអែល បានបើក "ប្រតិបត្តិការតោងើប" (Operation Rising Lion) ប្រឆាំងនឹងទីតាំងនុយក្លេអ៊ែរអ៊ីរ៉ង់ នៅព្រឹកព្រលឹមថ្ងៃសុក្រសប្ដាហ៍មុន ត្រឹមតែពីរថ្ងៃប៉ុណ្ណោះមុនពេលអ្នកចរចារបស់អាមេរិក និងអ៊ីរ៉ង់ គ្រោងបន្តពិភាក្សាដើម្បីបង្កើតកិច្ចព្រមព្រៀងថ្មីស្តីពីកម្មវិធីនុយក្លេអ៊ែររបស់អ៊ីរ៉ង់។

អ៊ីស្រាអែល បានហៅសកម្មភាពនោះថាជាការវាយប្រហារ "មុន" ដើម្បីរារាំងអ៊ីរ៉ង់ មិនឱ្យអភិវឌ្ឍអាវុធនុយក្លេអ៊ែរ។ អ៊ីរ៉ង់ បានបដិសេធថាខ្លួនមិនមានគម្រោងអភិវឌ្ឍអាវុធបែបនេះឡើយ ហើយបានសងសឹកវិញដោយបើកការវាយប្រហារប្រឆាំងនឹងអ៊ីស្រាអែល។

បារាំង អង់គ្លេស និងអាល្លឺម៉ង់ ដែលត្រូវគេស្គាល់ថា មហាអំណាចអឺរ៉ុបទាំង៣ ឬ E3 គឺជាភាគីនៃកិច្ចព្រមព្រៀងនុយក្លេអ៊ែរឆ្នាំ២០១៥ ជាមួយអ៊ីរ៉ង់ ដែលមានបំណងទប់ស្កាត់កម្មវិធីនុយក្លេអ៊ែររបស់ប្រទេសនេះ ជាថ្នូរនឹងការដកទណ្ឌកម្ម។ ប្រភពការទូតបារាំងនិយាយថា "បណ្ដារដ្ឋមន្ត្រីអឺរ៉ុប ជំរុញឱ្យអ៊ីរ៉ង់ ត្រលប់ទៅតុចរចាឱ្យបានលឿនតាមដែលអាចធ្វើទៅបានដោយគ្មានបុរេលក្ខខណ្ឌ" ហើយព្រមានអ៊ីរ៉ង់ ឱ្យជៀសវាងការសម្រេចចិត្តបែបប្រញាប់ប្រញាល់ប្រឆាំងនឹងផលប្រយោជន៍លោកខាងលិច។

រដ្ឋមន្ត្រីការបរទេសអ៊ីរ៉ង់ លោក Abbas Araqchi ត្រូវដកស្រង់សម្តីដោយប្រព័ន្ធផ្សព្វផ្សាយរដ្ឋ បាននិយាយថា លោកបានរំលឹកឡើងវិញពីភាពម៉ឺងម៉ាត់របស់អ៊ីរ៉ង់ក្នុងវិស័យការទូត ហើយសង្កត់ធ្ងន់ថា "អ៊ីរ៉ង់មិនដែលចាកចេញពីតុចរចាទេ ប៉ុន្តែការផ្តោតរបស់ទីក្រុងតេអេរ៉ង់នៅដំណាក់កាលនេះ គឺពិតណាស់ថាត្រូវតតាំងនឹងការឈ្លានពានពីខាងក្រៅ"៕