ប្រធានអង្គភាពឃ្លាំមើលនុយក្លេអ៊ែររបស់អង្គការសហប្រជាជាតិ បានប្រាប់សារព័ត៌មាន BBC នៅថ្ងៃចន្ទ (១៦ មិថុនា) ថា ម៉ាស៊ីនប្រមាណ ១៥.០០០គ្រឿង ដែលកំពុងដំណើរការនៅរោងចក្រចម្រាញ់សារធាតុអ៊ុយរ៉ានីញ៉ូមដ៏ធំបំផុតរបស់អ៊ីរ៉ង់ ក្នុងក្រុង Natanz ទំនងជារងការខូចខាតយ៉ាងធ្ងន់ធ្ងរ ឬត្រូវបំផ្លាញទាំងស្រុង ដោយសារតែការដាច់ចរន្តអគ្គិសនី ដែលបណ្តាលមកពីការវាយប្រហាររបស់អ៊ីស្រាអែល។

ទីភ្នាក់ងារថាមពលអាតូមិកអន្តរជាតិ ហៅកាត់ថា IAEA និងអគ្គនាយករបស់អង្គភាពនេះគឺលោក Rafael Grossi ធ្លាប់បាននិយាយថា ម៉ាស៊ីននៅរោងចក្រចម្រាញ់អ៊ុយរ៉ានីញ៉ូមក្រោមដីក្នុងក្រុង Natanz អាចនឹងត្រូវខូចខាត ដោយសារការវាយប្រហារតាមអាកាសលើបណ្ដាញផ្គត់ផ្គង់ថាមពល ទោះបីជាទីធ្លាដែលដាក់រោងចក្រនេះ មើលទៅហាក់ដូចជាមិនត្រូវបានវាយលុកក៏ដោយ។

លោក Grossi បាននិយាយក្នុងបទសម្ភាសន៍ជាមួយ BBC ថា "ការវាយតម្លៃរបស់ IAEA បង្ហាញថា ដោយសារតែការបាត់បង់ថាមពលខាងក្រៅភ្លាមៗ នោះអាចមានភាគរយខ្ពស់ដែលថា ម៉ាស៊ីនចម្រាញ់អ៊ុយរ៉ានីញ៉ូមអាចត្រូវបានបំផ្លាញទាំងស្រុង ឬមិនដូច្នេះទេក៏ត្រូវខូចខាតធ្ងន់ធ្ងរដែរ"។ គួរឱ្យដឹងថា ការដាច់ចរន្តអគ្គិសនីបង្កការគំរាមកំហែងខ្លាំងដល់ម៉ាស៊ីនដ៏ផុយស្រួយប្រភេទនេះ ដែលដំណើរការបង្វិលក្នុងល្បឿនដ៏លឿនបំផុត។

ការវាយប្រហារតាមអាកាសរបស់អ៊ីស្រាអ៊ែល បានធ្វើឱ្យរោងចក្រចម្រាញ់អ៊ុយរ៉ានីញ៉ូម យ៉ាងតិចចំនួន ២កន្លែង ត្រូវបញ្ឈប់សកម្មភាព ក្នុងចំណោមរោងចក្រអ៊ុយរ៉ានីញ៉ូមចំនួន៣ របស់អ៊ីរ៉ង់។ អ្នកការទូតជាន់ខ្ពស់ម្នាក់បានប្រាប់សារព័ត៌មានរ៉យទ័រថា មូលដ្ឋានក្រោមដីទាំងនោះជាកន្លែងស្តុកទុកអ៊ុយរ៉ានីញ៉ូមកម្រិតខ្ពស់បំផុតរបស់អ៊ីរ៉ង់ ប៉ុន្តែក៏នឹងត្រូវការត្រួតពិនិត្យដិតដល់បន្ថែមទៀតដើម្បីវាយតម្លៃពេញលេញពីស្ថានភាពនៅទីនោះ៕