នៅក្នុងជំហានដ៏គួរឱ្យភ្ញាក់ផ្អើលមួយ នាយករដ្ឋមន្ត្រីកាណាដា លោក Mark Carney បានប្រកាសកាលពីថ្ងៃចន្ទ (១៦ មិថុនា) ថា លោកបានយល់ព្រមជាមួយលោកប្រធានាធិបតីអាមេរិក Donald Trump ថា ប្រទេសទាំងពីរនឹងព្យាយាមសម្រេចកិច្ចព្រមព្រៀងសេដ្ឋកិច្ច និងសន្តិសុខថ្មីមួយក្នុងពេល ៣០ថ្ងៃ។

ការប្រកាសនេះធ្វើឡើងតែប៉ុន្មានម៉ោងប៉ុណ្ណោះ បន្ទាប់ពីក្រុមមន្ត្រីកាណាដានិយាយថា ភាគីទាំងពីរនៅតែមានការងារជាច្រើននៅខាងមុខ មុនពេលអាចសម្រេចកិច្ចព្រមព្រៀងបាន។ លោក Carney ដែលបានឈ្នះការបោះឆ្នោតខែមេសាជុំវិញការសន្យាថានឹងប្រឆាំងពន្ធរបស់លោក Trump កំពុងជំរុញនូវអ្វីដែលលោកហៅថា ទំនាក់ទំនងសេដ្ឋកិច្ច និងសន្តិសុខថ្មីមួយជាមួយអាមេរិក។

មេដឹកនាំទាំងពីរបានជួបគ្នាមុននោះ នៅក្រៅកិច្ចប្រជុំកំពូល G7 នៅខេត្ត Alberta ដោយលោក Trump បានរំលឹកឡើងវិញនូវចំណូលចិត្តរបស់លោកចំពោះការដំឡើងពន្ធ។ ការិយាល័យរបស់លោក Carney បាននិយាយក្នុងសេចក្តីថ្លែងការណ៍ថា "លោកនាយករដ្ឋមន្ត្រី Carney និងលោកប្រធានាធិបតី Trump បានចែករំលែកព័ត៌មានថ្មីៗពីបញ្ហាសំខាន់ៗស្តីពីទំនាក់ទំនងសេដ្ឋកិច្ច និងសន្តិសុខថ្មីរវាងកាណាដា និងសហរដ្ឋអាមេរិក"។

សេចក្តីថ្លែងការណ៍បន្ថែមថា "នៅទីបញ្ចប់ មេដឹកនាំទាំងពីរយល់ព្រមបន្តចរចាឆ្ពោះទៅរកកិច្ចព្រមព្រៀងមួយក្នុងពេល ៣០ថ្ងៃខាងមុខ"។ អ្នកនាំពាក្យរបស់លោក Carney ផ្ទាល់ក៏បញ្ជាក់ពីខ្លឹមសារនៃសេចក្តីថ្លែងការណ៍នេះ ដែលមានន័យថា ភាគីទាំងពីរចង់បានកិច្ចព្រមព្រៀងមួយក្នុង ៣០ថ្ងៃបន្ទាប់។

លោក Trump បាននិយាយនៅមុននេះថា កិច្ចព្រមព្រៀងថ្មីជាមួយកាណាដា អាចធ្វើទៅបាន ប៉ុន្តែក៏សង្កត់ធ្ងន់ថា ពន្ធនៅតែត្រូវដើរតួនាទីមួយ នៅក្នុងជំហរដែលរដ្ឋាភិបាលកាណាដាប្រឆាំងយ៉ាងខ្លាំង៕