មេដឹកនាំពិភពលោកដែលបានជួបប្រជុំគ្នាក្នុងកិច្ចប្រជុំកំពូលក្រុមប្រទេសមានសេដ្ឋកិច្ចលូតលាស់ខ្លាំងទាំងប្រាំពីរ ឬ G7 ក្នុងប្រទេសកាណាដានៅសប្តាហ៍នេះ នឹងព្យាយាមជំរុញប្រធានាធិបតីសហរដ្ឋអាមេរិកលោក Donald Trump ឱ្យងាកចេញពីសង្រ្គាមពាណិជ្ជកម្មរបស់លោក ដែលក្រុមអ្នកជំនាញនិយាយថាបង្កហានិភ័យដល់ស្ថិរភាពសេដ្ឋកិច្ចពិភពលោក។

ប្រទេសភាគច្រើនដែលបានតំណាងនៅជំនួប G7 គឺជាកម្មវត្ថុនៃការដំឡើងពន្ធ១០% របស់លោក Trump ជាមួយនឹងការគំរាមកំហែងបន្ថែមទៀតដែលនឹងកើតឡើង។ បណ្តាប្រទេសនៅអឺរ៉ុប និងជប៉ុនប្រឈម នឹងការដំឡើងពន្ធបន្ថែមលើរថយន្ត ដែកថែប និងអាលុយមីញ៉ូម។ ក្រុមសមាជិកប្រទេស G7 រួមមានកាណាដា បារាំង អាល្លឺម៉ង់ អ៊ីតាលី ជប៉ុន ចក្រភពអង់គ្លេស និងសហរដ្ឋអាមេរិក។

អំឡុងកិច្ចប្រជុំជាមួយម្ចាស់ផ្ទះ នាយករដ្ឋមន្ត្រីកាណាដា លោក Mark Carney លោក Trump បាននិយាយថា ពាណិជ្ជកម្មនឹងក្លាយជា "ការផ្តោតសំខាន់" នៃកិច្ចប្រជុំកំពូល ដែលបានចាប់ផ្តើមកាលពីថ្ងៃអាទិត្យ និងដំណើរការរហូតដល់ថ្ងៃអង្គារ១៧មិថុនា សប្ដាហ៍នេះ។

បញ្ហាពាណិជ្ជកម្មមានការចាប់អារម្មណ៍ជាពិសេសចំពោះប្រទេសកាណាដា បន្ទាប់ពីរដ្ឋបាលលោក Trump បានប្រកាសដំឡើងពន្ធបន្ថែមមួយចំនួនលើទំនិញកាណាដាក្នុងប៉ុន្មានខែថ្មីៗនេះ។

ស្របពេលមានការរំពឹងទុកតិចតួចថាកិច្ចប្រជុំកំពូលនឹងបញ្ចប់ដោយការទម្លាយភាពទាល់ច្រកនៃការចរចាពាណិជ្ជកម្មរវាងសហរដ្ឋអាមេរិក និងប្រទេសដទៃទៀតរបស់ពិភពលោក មន្ត្រីតំណាងពាណិជ្ជកម្មអាមេរិកលោក Jamieson Greer បានចូលរួមជាផ្នែកមួយនៃគណៈប្រតិភូរបស់លោក Trump ។

ប្រទេសរាប់សិបត្រូវបានជាប់គាំងក្នុងការចរចាជាមួយរដ្ឋបាលលោក Trump ដើម្បីទទួលបានកិច្ចព្រមព្រៀងពាណិជ្ជកម្មមួយចំនួនមុនពេលសហរដ្ឋអាមេរិកដំឡើងពន្ធ "ទៅវិញទៅមក" ឬពន្ធបដិការ ដែលត្រូវបានគំរាមកំហែងសម្រាប់ខែកក្កដាខាងមុខ៕