សេតវិមានបាននិយាយកាលពីថ្ងៃចន្ទថា ប្រធានាធិបតីសហរដ្ឋអាមេរិកលោក Donald Trump នឹងចាកចេញពីកិច្ចប្រជុំកំពូលG7 នៅប្រទេសកាណាដាមុនគេ ដោយសារតែស្ថានភាពនៅតំបន់មជ្ឈិមបូព៌ា។ ដោយថ្លែងរួមគ្នាជាមួយនាយករដ្ឋមន្ត្រីកាណាដា លោក Mark Carney លោកTrump បាននិយាយថា អតីតក្រុមប្រទេសទាំង៨ ឬ G8 មានកំហុសក្នុងការបណ្តេញរុស្ស៊ីចេញពីប្លុកនេះក្នុងឆ្នាំ ២០១៤ ក្រោយពីរុស្ស៊ី បានដាក់បញ្ចូលឧបសម្ព័ន្ធតំបន់គ្រីម៉េ។

លោក Trump បាននិយាយថា «នេះគឺជាកំហុសឆ្គងដ៏ធំមួយ» ហើយលោកជឿថា រុស្ស៊ីនឹងមិនឈ្លានពានអ៊ុយក្រែននៅឆ្នាំ២០២២នោះទេ ប្រសិនបើលោក Putin មិនត្រូវបានគេបណ្តេញចេញ។

ទោះបីជាលោក Trump បានឈប់និយាយភ្លាមៗថារុស្ស៊ីគួរតែត្រូវបានដាក់បញ្ចូលក្នុងប្លុកនេះឡើងវិញក៏ដោយ ប៉ុន្តែការអត្ថាធិប្បាយរបស់លោកបានធ្វើឱ្យមានមន្ទិលសង្ស័យអំពីថាតើប្រធានាធិបតីអ៊ុយក្រែនលោក Volodymyr Zelenskyy អាចសម្រេចបានប៉ុណ្ណា នៅពេលដែលលោកគ្រោងនឹងជួបជាមួយមេដឹកនាំជាច្រើនរូបនៅថ្ងៃអង្គារនេះ។

លោក Josh Lipsky អតីតមន្ត្រីជាន់ខ្ពស់ IMF ដែលបច្ចុប្បន្នជាប្រធានសេដ្ឋកិច្ចអន្តរជាតិនៅក្រុមប្រឹក្សាអាត្លង់ទិក បាននិយាយថា «វាគឺជាការចាប់ផ្តើមដ៏លំបាក» ខណៈបណ្តាប្រទេសនៅអឺរ៉ុប ចង់បញ្ចុះបញ្ចូលលោក Trump ឱ្យគាំទ្រការដាក់ទណ្ឌកម្មកាន់តែតឹងរ៉ឹងលើទីក្រុងមូស្គូ។



លោក Zelenskiy បាននិយាយថា លោកមានផែនការពិភាក្សាអំពីការទិញអាវុធថ្មីៗសម្រាប់អ៊ុយក្រែនជាមួយ លោក Trump ។ មន្ត្រីអឺរ៉ុប សង្ឃឹមថានឹងប្រើប្រាស់កិច្ចប្រជុំនៅថ្ងៃអង្គារនេះជាមួយលោក Zelenskiy និងអគ្គលេខាធិការសម្ព័ន្ធយោធាណាតូ លោក Mark Rutte និងកិច្ចប្រជុំកំពូលរបស់អង្គការណាតូ នៅសប្តាហ៍ក្រោយ ដើម្បីបញ្ចុះបញ្ចូលលោក Trump ឱ្យពង្រឹងជំហររបស់លោក។