ការវាយប្រហារតបតគ្នាទៅមកជាច្រើនថ្ងៃរវាងអ៊ីស្រាអែល និងអ៊ីរ៉ង់ ដែលជាសត្រូវដ៏ជូរចត់យូរអង្វែងទាំងពីរ បានបើកទំព័រថ្មីមួយក្នុងប្រវត្តិសាស្រ្តដ៏ច្របូកច្របល់ ហើយមនុស្សជាច្រើនក្នុងតំបន់ភ័យខ្លាចថា ជម្លោះកាន់តែរីកធំទប់មិនជាប់ ខណៈរលកវាយប្រហារបានបន្តលើអាកាស ៥យប់ជាប់ៗគ្នា។

ជម្លោះចុងក្រោយនេះបានបង្ខំឱ្យប្រទេសភាគច្រើននៅមជ្ឈិមបូព៌ាបិទដែនអាកាសរបស់ពួកគេ ដោយអាកាសយានដ្ឋានរាប់សិបកន្លែងបានបញ្ឈប់រាល់ជើងហោះហើរទាំងអស់ ឬកាត់បន្ថយប្រតិបត្តិការយ៉ាងច្រើន ដែលបណ្តាលឱ្យអ្នកដំណើររាប់ម៉ឺននាក់ត្រូវជាប់គាំង ហើយអ្នកផ្សេងទៀតមិនអាចគេចចេញពីជម្លោះ ឬធ្វើដំណើរទៅប្រទេសកំណើតវិញបាន។

លោក John Cox អាកាសយានិកចូលនិវត្តន៍ និងជាអ្នកជំនាញផ្នែកសុវត្ថិភាពអាកាសចរណ៍ បាននិយាយថា "ឥទ្ធិពលដូមីណូនៅទីនោះគឺធំធេងណាស់" ពោលគឺដួលមួយដួលទាំងអស់ ខណៈព្រមានថា ការរំខាននេះនឹងមានតម្លៃខូចខាតយ៉ាងអាក្រក់។ អ៊ីស្រាអែល បានបិទអាកាសយានដ្ឋាន Ben Gurion អន្តរជាតិដ៏សំខាន់របស់ខ្លួន "រហូតដល់មានការជូនដំណឹងបន្ថែម" ដោយទុកឱ្យអ្នកដំណើរអ៊ីស្រាអែលជាង ៥០.០០០នាក់ ជាប់គាំងនៅបរទេស។ យន្តហោះរបស់ក្រុមហ៊ុនអាកាសចរណ៍ចំនួន៣ របស់ប្រទេសនេះក៏ត្រូវផ្លាស់ទៅទីក្រុង Larnaca។

អ៊ីរ៉ង់ នៅថ្ងៃសុក្រសប្ដាហ៍មុន បានផ្អាកជើងហោះហើរទៅកាន់ និងចេញពីអាកាសយានដ្ឋានអន្តរជាតិ Khomeini ដ៏សំខាន់របស់ខ្លួននៅជាយក្រុងតេអេរ៉ង់។ ព្រលានយន្តហោះនៅអ៊ីរ៉ាក់ ដែលនៅជិតខាង ក៏បានបិទទាំងអស់ ដោយសារនៅជិតអ៊ីរ៉ង់ខ្លាំងពេក។ ទោះបីជាដែនអាកាសនៅតែបើកចំហមួយផ្នែកក្នុងលីបង់ និងហ្ស៊កដានីក៏ដោយ ក៏ស្ថានភាពនៅតែវឹកវរ ដោយអ្នកដំណើរជាច្រើនបានជាប់គាំងទាំងក្នុង និងក្រៅប្រទេសជាមួយនឹងការពន្យារពេល និងលុបចោលជើងហោះហើរ។ ក្រុមហ៊ុនអាកាសចរណ៍ជាច្រើនបានបន្ថយជើងហោះហើរ ឬបញ្ឈប់ប្រតិបត្តិការទាំងស្រុង ហើយអាជ្ញាធរបានបិទព្រលានយន្តហោះពេញមួយយប់ ជាពេលវេលាដែលការវាយប្រហារមានកម្រិតខ្លាំងក្លាបំផុត៕