អ្នករួចជីវិតពីគ្រោះថ្នាក់នេះបាននិយាយកាលពីថ្ងៃចន្ទ (១៦ មិថុនា) ថា ចំនួនអ្នកស្លាប់ដោយសារការវាយប្រហារពីខ្មាន់កាំភ្លើង កាលពីចុងសប្តាហ៍ នៅភាគខាងជើងប៉ែកកណ្តាលប្រទេសនីហ្សេរីយ៉ា បានកើនឡើងដល់ ១៥០នាក់ ខណៈអ្នកភូមិនៅតែបន្តជីកកកាយលំនៅឋានដែលត្រូវបានដុត ដើម្បីរាប់ចំនួនជនរងគ្រោះបន្ថែមទៀត និងស្វែងរកមនុស្សរាប់សិបនាក់ដែលនៅតែបាត់ខ្លួន។

ក្រុមអ្នកវាយប្រហារបានសម្រុកចូលសហគមន៍ Yelewata នៃរដ្ឋ Benue កាលពីយប់ថ្ងៃសុក្រសប្ដាហ៍មុន ដោយបានបើកការបាញ់ប្រហារលើអ្នកភូមិដែលកំពុងសម្រាន្តលក់ ហើយដុតផ្ទះសម្បែងរបស់ពួកគេ នេះបើតាមការលើកឡើងរបស់អ្នករួចជីវិត និងសហជីពកសិករក្នុងតំបន់។ អ្នកស្លាប់ជាច្រើននាក់ បានជ្រកកោននៅផ្សារក្នុងស្រុកមួយ បន្ទាប់ពីភៀសខ្លួនពីអំពើហិង្សាក្នុងផ្នែកផ្សេងទៀតនៃរដ្ឋ។

ភ្លាមៗនេះ ពុំទាន់មានក្រុមណាមួយចេញមុខអះអាងទទួលខុសត្រូវចំពោះការសម្លាប់នោះទេ ប៉ុន្តែការវាយប្រហារបែបនេះគឺជារឿងធម្មតាទៅហើយនៅក្នុងតំបន់ភាគខាងជើងនៃប្រទេសនីហ្សេរីយ៉ា ជាទីដែលអ្នកគង្វាលក្នុងស្រុក និងកសិករ តែងតែប៉ះទង្គិចគ្នាជុំវិញដែនកំណត់ដីធ្លី និងទឹក។ ជម្លោះអូសបន្លាយកាន់តែធ្ងន់ធ្ងរក្នុងប៉ុន្មានឆ្នាំចុងក្រោយនេះ ដោយអាជ្ញាធរ និងក្រុមអ្នកវិភាគព្រមានថា មានអ្នកចិញ្ចឹមសត្វចាប់ផ្ដើមកាន់អាវុធកាន់តែច្រើន។

អភិបាលរងរដ្ឋ Benue លោក Sam Ode និយាយថា លោកសង្ស័យថា ជនដៃដល់គឺជាក្រុមអ្នកគង្វាល។ ប្រធានាធិបតីនីហ្សេរីយ៉ា លោក Bola Tinubu ដែលរដ្ឋាភិបាលរបស់លោកបរាជ័យក្នុងការបញ្ចប់វិបត្តិសន្តិសុខដ៏បង្ហូរឈាមបែបនេះ បានពណ៌នាការវាយប្រហារនៅ Benue ថាជា "ការបង្ហូរឈាមដោយគ្មានន័យ"៕