សមាជិកនៃសហគមន៍ពលរដ្ឋអ៊ីរ៉ង់នៅប្រទេសកាណាដា បានមកប្រមូលផ្តុំគ្នានៅខាងក្រៅសាលាក្រុងតូរ៉ុនតូ កាលពីថ្ងៃចន្ទ ទី១៦ មិថុនា ដើម្បីអំពាវនាវឱ្យមានបទឈប់បាញ់រវាងអ៊ីរ៉ង់ និងអ៊ីស្រាអែល។

ក្រុមអ្នកតវ៉ា បាននិយាយទៅកាន់សារព័ត៌មាន Reuters ពីការព្រួយបារម្ភរបស់ពួកគេចំពោះគ្រួសារនៅក្នុងប្រទេសអ៊ីរ៉ង់ ដោយនិយាយថា ប្រជាជនអ៊ីរ៉ង់ ចង់បានសន្តិភាព។

អ៊ីស្រាអែល បានវាយប្រហារលើប្រទេសអ៊ីរ៉ង់កាលពីថ្ងៃសុក្រ ទី១៣ មិថុនា ហើយចាប់តាំងពីពេលនោះមក ប្រទេសទាំងពីរបានបាញ់ផ្លោងដាក់គ្នាដោយមីស៊ីល ដោយមន្ត្រីអ៊ីរ៉ង់រាយការណ៍ថាមានអ្នកស្លាប់ជាង២២០នាក់ភាគច្រើនជាជនស៊ីវិលក្នុងរយៈពេល៥ថ្ងៃមកនេះ ខណៈអ៊ីស្រាអែលបាននិយាយថាជនស៊ីវិលជិត៤០នាក់បានស្លាប់។

អ៊ីស្រាអែលនិយាយថា ខ្លួនមានបំណងលុបបំបាត់នូវអ្វីដែលត្រូវបានចាត់ទុកថាជាការគំរាមកំហែង បង្កឡើងដោយកម្មវិធីនុយក្លេអ៊ែរ និងមីស៊ីលបាលីស្ទីករបស់អ៊ីរ៉ង់។ ប៉ុន្តែអ៊ីរ៉ង់ បានបដិសេធពីការការព្យាយាមអភិវឌ្ឍអាវុធនុយក្លេអ៊ែរ និងបានចង្អុលបង្ហាញពីសិទ្ធិរបស់ខ្លួនចំពោះបច្ចេកវិទ្យានុយក្លេអ៊ែរសម្រាប់គោលបំណងសន្តិវិធី រួមទាំងការចម្រាញ់សារធាតុអ៊ុយរ៉ានីញ៉ូម ខណៈជាភាគីនៃសន្ធិសញ្ញាមិនរីកសាយនុយក្លេអ៊ែរ។

អ៊ីស្រាអែល ដែលពុំមែនជាភាគីសន្ធិសញ្ញាមិនរីកសាយនុយក្លេអ៊ែរទេ តែជាប្រទេសតែមួយគត់នៅតំបន់មជ្ឈិមបូព៌ា ដែលត្រូវបានគេជឿថាមានអាវុធនុយក្លេអ៊ែរ។ អ៊ីស្រាអែលពុំបានបដិសេធ ឬបញ្ជាក់ពីរឿងនេះនោះទេ។