គណៈកម្មការអឺរ៉ុប គ្រោងដាក់សំណើមួយនៅថ្ងៃអង្គារ (១៧ មិថុនា) នេះដើម្បីហាមឃាត់ការនាំចូលឧស្ម័ន និងឧស្ម័នធម្មជាតិរាវ (LNG) របស់រុស្ស៊ី ទៅក្នុងសហភាពអឺរ៉ុប ត្រឹមចុងឆ្នាំ២០២៧ ដោយប្រើប្រាស់វិធានការផ្លូវច្បាប់ដើម្បីធានាថា ផែនការនេះមិនអាចត្រូវបានរារាំងដោយសមាជិកប្លុកអឺរ៉ុប ហុងគ្រី និងស្លូវ៉ាគី ដែលរួសរាយដាក់ទីក្រុងមូស្គូ។

សំណើនេះនឹងកំណត់ពីវិធីសាស្រ្តដែលសហភាពអឺរ៉ុប គ្រោងនឹងប្រែក្លាយឱ្យទៅជាច្បាប់ពេញលេញ ខណៈប្លុកនេះបានប្តេជ្ញាចិត្តថា នឹងបញ្ចប់ទំនាក់ទំនងថាមពលអាយុកាលរាប់ទសវត្សរ៍ជាមួយរុស្ស៊ី ដែលជាអតីតអ្នកផ្គត់ផ្គង់ឧស្ម័នធម្មជាតិចម្បងរបស់អឺរ៉ុប ក្នុងជំហានមួយដែលធ្វើឡើងបន្ទាប់ពីប្រតិបត្តិការយោធាពេញលក្ខណៈរបស់ទីក្រុងមូស្គូឆ្នាំ២០២២ លើអ៊ុយក្រែន។

សេចក្តីសង្ខេបមួយច្បាប់របស់គណៈកម្មការផ្ទៃក្នុងនៃសំណើនោះ ដែលមើលឃើញដោយទីភ្នាក់ងារសារព័ត៌មានរ៉យទ័រ បាននិយាយថា ខ្លួននឹងធ្វើឱ្យសំណើក្លាយជាច្បាប់ពេញលេញ ស្តីពីការហាមឃាត់ការនាំចូលឧស្ម័នពីបំពង់បង្ហូររបស់រុស្ស៊ី និងឧស្ម័ន LNG ចាប់ពីថ្ងៃទី០១ ខែមករា ឆ្នាំ២០២៦ ជាមួយនឹងពេលវេលាកំណត់យូរជាងនេះសម្រាប់កិច្ចសន្យាជាក់លាក់។

ឯកសារនោះនិយាយថា កិច្ចព្រមព្រៀងឧស្ម័នរុស្ស៊ី រយៈពេលខ្លី ដែលបានចុះហត្ថលេខាមុនថ្ងៃទី១៧ ខែមិថុនា ឆ្នាំ២០២៥ នឹងមានរយៈពេលផ្លាស់ប្តូរមួយឆ្នាំ ដល់ថ្ងៃទី១៧ ខែមិថុនា ឆ្នាំ២០២៦។ សេចក្តីសង្ខេបបន្តថា ក្រោយមក ការនាំចូលក្រោមកិច្ចសន្យារយៈពេលវែងដែលមានស្រាប់របស់រុស្ស៊ី នឹងត្រូវហាមឃាត់ចាប់ពីថ្ងៃទី០១ ខែមករា ឆ្នាំ២០២៨ ដែលជាការបញ្ចប់យុគសម័យប្រើប្រាស់ឧស្ម័នរុស្ស៊ីរបស់សហភាពអឺរ៉ុប ប្រកបដោយប្រសិទ្ធភាពត្រឹមកាលបរិច្ឆេទនោះ៕