អគ្គលេខាធិការអង្គការសហប្រជាជាតិ លោក Antonio Guterres កាលពីថ្ងៃចន្ទ បានបង្ហាញការព្រួយបារម្ភយ៉ាងខ្លាំងរបស់លោក ចំពោះសេចក្តីប្រកាសនាពេលថ្មីៗនេះនិងចំណាត់ការនានា ដែលបានធ្វើឡើងដោយប្រទេសមួយចំនួន ដើម្បីដកខ្លួនចេញពីអនុសញ្ញាហាមឃាត់គ្រាប់មីនប្រឆាំងមនុស្ស។

ប្រទេសប៉ូឡូញ ហ្វាំងឡង់ និងរដ្ឋតំបន់បាល់ទិកទាំងបីមានប្រទេសអេស្តូនី ឡាតវី និងលីទុយអានី ថ្មីៗនេះបានប្រកាសពីបំណងរបស់ខ្លួនក្នុងការដកខ្លួនចេញពីអនុសញ្ញានេះ។

លោក Guterres បាននិយាយនៅក្នុងសេចក្តីថ្លែងការណ៍ថា «ការប្រកាសទាំងនេះ មានបញ្ហាលំបាកច្រើន ព្រោះវាមានហានិភ័យធ្វើឱ្យការការពារជនស៊ីវិលចុះខ្សោយ និងធ្វើឱ្យអន្តរាយដល់រយៈពេលពីរទសវត្សរ៍នៃក្របខ័ណ្ឌបទដ្ឋានដែលបានជួយសង្គ្រោះជីវិតមនុស្សរាប់មិនអស់»។ «ខ្ញុំសុំជំរុញឱ្យរដ្ឋទាំងអស់ប្រកាន់ខ្ជាប់នូវសន្ធិសញ្ញារំសាយអាវុធមនុស្សធម៌ ហើយបញ្ឈប់ជាបន្ទាន់ រាល់ចំណាត់ការឈានទៅរកការដកខ្លួនចេញ។

លោក ក៏បានអំពាវនាវដល់រដ្ឋចំនួន៣២ទៀត ដែលពុំទាន់បានចូលរួមក្នុងអនុសញ្ញានេះ។ លោក Guterres និយាយថា លោកមានបំណងចាប់ផ្តើមយុទ្ធនាការសកលមួយ ដើម្បីពន្លឿនសកម្មភាពកំចាត់មីន និងជំរុញឆ្ពោះទៅរកចក្ខុវិស័យនៃពិភពលោកគ្មានមីន។