យោងតាមការស្ទង់មតិរបស់សារព័ត៌មានរ៉យទ័រ និងស្ថាប័ន Ipsos ដែលបានបិទកាលពីថ្ងៃចន្ទ (១៦ មិថុនា) ដើមសប្ដាហ៍នេះបានបង្ហាញថា អត្រាគាំទ្រសាធារណៈរបស់លោកប្រធានាធិបតីអាមេរិក Donald Trump បានបន្តឈរទ្រឹងក្នុងអត្រា ៤២% រយៈពេលមួយខែចុងក្រោយនេះ ប៉ុន្តែប្រជាជនអាមេរិក កាន់តែមិនសូវគាំទ្រចំពោះវិធីសាស្រ្តបង្ក្រាបអន្តោប្រវេសន៍មិនបន្ធូរដៃរបស់លោក។

ការស្ទង់មតិរយៈពេល ៦ថ្ងៃនេះបានបង្ហាញថា អត្រា ៤២% នៃមនុស្សពេញវ័យនៅសហរដ្ឋអាមេរិក បានយល់ស្របលើការងារដែលអ្នកនយោបាយមកពីបក្សសាធារណរដ្ឋរូបនេះកំពុងធ្វើក្នុងនាមជាប្រធានាធិបតី ដែលជាតួលេខនឹងថ្កល់មិនកម្រើកពីការស្ទង់មតិ Reuters/Ipsos លើកមុន ដែលបានធ្វើឡើងនៅថ្ងៃទី១៦-១៨ ខែឧសភា។ ប្រជាប្រិយភាពរបស់លោក Trump បន្តនៅទ្រឹងមិនឡើងមិនចុះចាប់តាំងពីខែកុម្ភៈមក ហើយអត្រាថ្មីនេះបានធ្លាក់ចុះ ៥ពិន្ទុពីការគាំទ្រ ៤៧% ដែលលោកទួលបានភ្លាមៗបន្ទាប់ពីត្រលប់ទៅសេតវិមានវិញក្នុងខែមករា។

យ៉ាងណាមិញ ការគាំទ្ររបស់លោកលើគោលនយោបាយអន្តោប្រវេសន៍បានធ្លាក់ចុះដល់ ៤៤% ពីអត្រា ៤៧% កាលពីពាក់កណ្តាលខែឧសភា។ លោក Trump បានសន្យាថា នឹងនិរទេសមនុស្សរាប់លាននាក់ដែលមិនត្រូវបានអនុញ្ញាតិឱ្យរស់នៅក្នុងសហរដ្ឋអាមេរិក។

អត្រាវាយតម្លៃរបស់លោក Trump លើជនអន្តោប្រវេសន៍កាន់តែមើលទៅដូចជាអត្រាវាយតម្លៃរបស់លោកលើផ្នែកផ្សេងទៀតនៃគោលនយោបាយជារួម ដោយអត្រានៃមនុស្សដែលមិនពេញចិត្តចំពោះការងារប្រធានាធិបតីរបស់លោក បានកើនឡើងលើសពីតួលេខគាំទ្រដ៏ទន់ខ្សោយ៕