ការស្រាវជ្រាវថ្មីមួយបានរកឃើញថា ប្រជាជនអូស្ត្រាលី ភាគច្រើនរំពឹងថា ប្រទេសចិន នឹងក្លាយជាប្រទេសដែលមានឥទ្ធិពលបំផុតនៅលើពិភពលោកនៅឆ្នាំ២០៣៥ ខាងមុខ ខណៈជំនឿទុកចិត្តជាសកលលើសហរដ្ឋអាមេរិក បានធ្លាក់ចុះយ៉ាងគំហុក។

ទិន្នន័យស្ទង់មតិបង្ហាញថា ជនជាតិអូស្ត្រាលីប្រហែលម្នាក់ក្នុងចំណោមបីនាក់ ពោលគឺ ៣៦%ប៉ុណ្ណោះ បានជឿទុកចិត្តថា អាមេរិក អាចធ្វើសកម្មភាពប្រកបដោយការទទួលខុសត្រូវលើឆាកពិភពលោក ដែលតំណាងឱ្យការធ្លាក់ចុះ ២០ពិន្ទុពីឆ្នាំ២០២៤ និងជាសមាមាត្រតូចបំផុតចាប់តាំងពីវិទ្យាស្ថាន Lowy បានចាប់ផ្តើមការស្ទង់មតិនៅឆ្នាំ២០០៥ មក។

របាយការណ៍ឆ្នាំ២០២៥ របស់ស្ថាប័នស្រាវជ្រាវនេះរកឃើញថា មានតែអ្នកឆ្លើយសំណួរម្នាក់ក្នុងចំណោម ៤នាក់ប៉ុណ្ណោះ ដែលមានទំនុកចិត្តលើវិធីសាស្រ្តរបស់លោកប្រធានាធិបតីអាមេរិក Donald Trump ចំពោះកិច្ចការពិភពលោក - ផ្ទុយពីអត្រា ៤៦% ដែលបង្ហាញជំនឿចិត្តលើលោក Joe Biden កាលពីឆ្នាំមុន។

ចំណែកទំនុកចិត្តលើមេដឹកនាំចិន លោក Xi Jinping បានកើនឡើង ៤ពិន្ទុដល់ ១៦% ហើយប្រជាជនអូស្ត្រាលីបានខ្វែងគំនិតគ្នាលើទស្សនៈថា តើ Xi ឬលោក Trump គឺជាដៃគូដែលគួរឱ្យទុកចិត្តជាង។ មានតែអ្នកឆ្លើយតបម្នាក់ក្នុងចំណោម ៤នាក់ប៉ុណ្ណោះ ដែលជឿថាអាមេរិក នឹងក្លាយជាប្រទេសដ៏សំខាន់ និងមានឥទ្ធិពលបំផុតក្នុងពេល ១០ឆ្នាំខាងមុខ ដោយជាងពាក់កណ្តាលរំពឹងថា ប្រទេសចិន នឹងវ៉ាដាច់អាមេរិក ហើយក្លាយជាប្រទេសមានឥទ្ធិពលបំផុតនៅឆ្នាំ២០៣៥ ដ៏ឆាប់ខាងមុខនេះ៕