អ្នករបួសជាច្រើនរយនាក់ត្រូវបាននាំចូលទៅមន្ទីរពេទ្យ Imam Khomeini ក្នុងទីក្រុងតេអេរ៉ង់ ចាប់តាំងពីថ្ងៃសុក្រសប្ដាហ៍មុនមក នៅពេលអ៊ីស្រាអែល បើកប្រតិបត្តិការយោធាប្រឆាំងនឹងអ៊ីរ៉ង់ ដែលជាគូសត្រូវដ៏ជូរចត់របស់ខ្លួន។ រលកជាបន្តបន្ទាប់នៃការវាយប្រហាររបស់អ៊ីស្រាអែល លើរដ្ឋធានីអ៊ីរ៉ង់មួយនេះ បានដាក់បន្ទុកខ្លាំងលើអង្គភាពសង្គ្រោះបន្ទាន់របស់មន្ទីរពេទ្យ ដោយវេជ្ជបណ្ឌិតម្នាក់បានពណ៌នាថា ការទម្លាក់គ្រាប់បែកបានប្រែក្លាយមណ្ឌលសុខភាពនោះឱ្យទៅជា "ថ្លុកឈាម"។

វេជ្ជបណ្ឌិតនៅអង្គភាពសង្គ្រោះបន្ទាន់នៃមន្ទីរពេទ្យ Imam Khomeini បានប្រាប់សារព័ត៌មាន Guardian កាលពីថ្ងៃចន្ទ (១៦ មិថុនា) ថា "ទីនោះដូចជាថ្លុកឈាម បុគ្គលិកត្រូវគ្របដណ្តប់ដោយភាពចលាចល និងសម្រែកនៃសមាជិកគ្រួសារដែលសោកសៅ ហើយមនុស្សរាប់រយនាក់រងរបួសគំរាមកំហែងដល់អាយុជីវិត របួសស្រាល ហើយសាកសពក៏ត្រូវនាំទៅមន្ទីរពេទ្យនោះដែរ"។

នៅពេលការប្រយុទ្ធគ្នារវាងអ៊ីស្រាអែល និងអ៊ីរ៉ង់ បានឈានចូលដល់ថ្ងៃទី៥ របស់ខ្លួន មន្ទីរពេទ្យអ៊ីរ៉ង់នានាកំពុងពោរពេញដោយអ្នករបួស បរិក្ខារពេទ្យរងសម្ពាធ និងបុគ្គលិកដែលអស់កម្លាំង។ គ្រូពេទ្យបានពណ៌នាទិដ្ឋភាពនៃភាពចលាចល ការបង្ហូរឈាម និងការហូរចូលនៃអ្នករបួស ដែលហាក់ដូចជាកើនឡើងឥតឈប់ឈរ នៅពេលការវាយប្រហាររបស់អ៊ីស្រាអែល បន្តនៅក្នុងកម្រិតដ៏ខ្លាំងក្លា។

អាជ្ញាធរអ៊ីរ៉ង់ និយាយថា គិតត្រឹមព្រឹកថ្ងៃចន្ទ (១៦ មិថុនា) មនុស្សជិត ១.៣០០នាក់ត្រូវបញ្ជូនទៅមន្ទីរពេទ្យនៅទូទាំងបណ្តាញវេជ្ជសាស្រ្តសាកលវិទ្យាល័យរបស់ប្រទេស ដែលក្នុងនោះមានអ្នកស្លាប់ជិត ២៣០នាក់។ វេជ្ជបណ្ឌិតនៅមន្ទីរពេទ្យ Imam Khomeini បានព្រមានថា ចំនួនអ្នកស្លាប់ពិតប្រាកដគឺអាចនឹងច្រើនជាងនេះ៕