ប្រមុខសិទ្ធិមនុស្សរបស់អង្គការសហប្រជាជាតិ លោក Volker Turk បាននិយាយថា សង្គ្រាមអ៊ីស្រាអែល នៅដែនដីហ្កាហ្សា កំពុងធ្វើឱ្យមាន "ការឈឺចាប់ទុក្ខវេទនាដ៏គួរឱ្យរន្ធត់ដែលមិនអាចដឹងបាន" លើជនជាតិប៉ាឡេស្ទីន ហើយកាលពីថ្ងៃចន្ទ (១៦ មិថុនា) បានជំរុញឱ្យបណ្ដាមេដឹកនាំនៃរដ្ឋាភិបាលទូទាំងសកលលោកឱ្យ "ភ្ញាក់ខ្លួនឡើង" និងដាក់សម្ពាធឱ្យកាន់តែខ្លាំងដើម្បីបញ្ចប់ជម្លោះដ៏បង្ហូរឈាមនេះ។

លោក Turk បាននិយាយក្នុងការបើកសម័យប្រជុំក្រុមប្រឹក្សាសិទ្ធិមនុស្សថា "ការពិតកំពុងលាតត្រដាងដោយខ្លួនឯងពីស្ថានភាពបច្ចុប្បន្ន ហើយមនុស្សគ្រប់គ្នានៅក្នុងរដ្ឋាភិបាលអន្តរជាតិ ត្រូវតែភ្ញាក់ខ្លួនឡើង ចំពោះអ្វីដែលកំពុងកើតមាននៅហ្កាហ្សា។ អ្នកដែលមានឥទិ្ធពលទាំងអស់ត្រូវតែដាក់សម្ពាធជាអតិបរមាលើអ៊ីស្រាអែល និងក្រុមហាម៉ាស ដើម្បីបញ្ចប់ការរងទុក្ខដែលមិនអាចទ្រាំបាននេះ"។

ឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សរូបនេះ តែងតែលើកឡើងពីការបង្ហូរឈាមនៅតំបន់ហ្កាហ្សា និងបានអំពាវនាវឱ្យមានការដោះលែងចំណាប់ថ្នូរអ៊ីស្រាអែល ដែលឃុំខ្លួនដោយពួកសកម្មប្រយុទ្ធប៉ាឡេស្ទីនហាម៉ាស ហើយលោក Turk ក៏បានប្រើភាសាខ្លាំងៗបំផុតរបស់លោកដើម្បីគូសបញ្ជាក់ពីអំពើហិង្សាធ្ងន់ធ្ងរនៅមជ្ឈិមបូព៌ា ជាពិសេសសង្រ្គាមហ្កាហ្សា។

បេសកកម្មការទូតរបស់អ៊ីស្រាអែល នៅទីក្រុងហ្សឺណែវ បានឆ្លើយតបទៅវិញដោយចោទប្រកាន់លោក Turk និងការិយាល័យរបស់លោកថា "តែងធ្វើសេចក្តីថ្លែងការណ៍គ្មានការទទួលខុសត្រូវ និងមិនមានការអប់រំឥតឈប់ឈរ ទាក់ទងនឹងការប្រព្រឹត្តអរិភាពរបស់អ៊ីស្រាអែល រួមទាំងការពឹងផ្អែកលើព័ត៌មានដែលផ្សព្វផ្សាយដោយអង្គការភេរវករហាម៉ាស"៕