សារព័ត៌មានPolitico បានរាយការណ៍ថា មន្ទីរបញ្ចកោណ បានបង្វែរទិសដៅយន្តហោះចាក់ប្រេងរាប់សិប គ្រឿងរបស់«កងទ័ពអាកាស» ទៅកាន់អឺរ៉ុប ដើម្បីជាវិធានការបង្ការ ក្នុងករណីជម្លោះប្រដាប់អាវុធរវាងអ៊ីស្រាអែល និងអ៊ីរ៉ង់ កាន់តែតានតឹងឡើង។

ដោយដកស្រង់ប្រភពយោធាដែលមិនបញ្ចេញឈ្មោះចំនួនពីរ សារព័ត៌មាននេះ បានរាយការណ៍ថា យន្តហោះទាំងនេះ បានចាកចេញពីមូលដ្ឋានអាមេរិករបស់ពួកគេ កាលពីចុងសប្តាហ៍មុន ដើម្បីដាក់ពង្រាយឡើងវិញ នៅក្នុងទ្វីបអឺរ៉ុប ជា«វិធានការបង្ការ ដើម្បីគាំទ្រដល់ប្រតិបត្តិការណាមួយ នៅមជ្ឈិមបូព៌ា» ក្នុងករណីដែលសហរដ្ឋអាមេរិក សម្រេចចិត្តជួយអ៊ីស្រាអែល ក្នុងការប្រឈមមុខជាមួយនឹងប្រទេសអ៊ីរ៉ង់។

ក្រោយមក របាយការណ៍ស្រដៀងគ្នានេះ បានចេញមកពីសារព័ត៌មាន Fox News ។

មន្ទីរបញ្ចកោណ និងទីបញ្ជាការកណ្តាលរបស់សហរដ្ឋអាមេរិក ពុំអាចទាក់ទងសុំការអត្ថាធិប្បាយបានទេ។

កាលពីយប់ថ្ងៃទី ១៣ ខែមិថុនា អ៊ីស្រាអែល បានចាប់ផ្តើមប្រតិបត្តិការតោងើបរបស់ខ្លួន ដោយកំណត់គោលដៅលើកម្មវិធីនុយក្លេអ៊ែររបស់អ៊ីរ៉ង់។ អ៊ីរ៉ង់បានឆ្លើយតបក្នុងរយៈពេលតិចជាង ២៤ម៉ោង។ នៅថ្ងៃបន្ទាប់ ទីក្រុងតែលអាវីវ (Tel Aviv) និងទីក្រុងតេអេរ៉ង់ បានវាយប្រហារគ្នាម្តងទៀត។ ភាគីទាំងពីរ បានរាយការណ៍ពីជនរងគ្រោះ និងការខូចខាត ហើយបានទទួលស្គាល់ថា គ្រឿងបរិក្ខារមួយចំនួន ត្រូវបានរងការខូចខាត ប៉ុន្តែបាននិយាយថា ការខូចខាតមានកម្រិត។