អ្នកនាំពាក្យវិមានក្រឹមឡាំង លោក Dmitry Peskov បាននិយាយក្នុងអំឡុងសន្និសីទមួយថា ទីក្រុងមូស្គូនៅតែបើកចំហ ចំពោះគំនិតនៃការរក្សាទុកសារធាតុអ៊ុយរ៉ានីញ៉ូមរបស់អ៊ីរ៉ង់ នៅក្នុងប្រទេសរុស្ស៊ី ប៉ុន្តែជាមួយនឹងការផ្ទុះឡើងនៃការប្រយុទ្ធគ្នាថ្មីជាមួយអ៊ីស្រាអែល ភាពស្មុកស្មាញថែមទៀត បានកើតឡើងនៅក្នុងស្ថានភាពនេះ ជាមួយកម្មវិធីនុយក្លេអ៊ែររបស់អ៊ីរ៉ង់។  

ការលើកឡើងរបស់លោក បានធ្វើឡើងក្នុងការឆ្លើយតបទៅនឹងសំណួរអំពីគំនិតផ្តួចផ្តើមរបស់រុស្ស៊ីដែលអាចធ្វើទៅបាន ដើម្បីជួយបន្ថយភាពតានតឹង និងដឹកនាំស្ថានការណ៍ឆ្ពោះទៅរកដំណោះស្រាយដោយសន្តិវិធី។ របាយការណ៍កន្លងទៅ បានបញ្ជាក់ថា រុស្ស៊ីអាចនឹងការពារឃ្លាំងស្តុកសារធាតុអ៊ុយរ៉ានីញ៉ូមរបស់អ៊ីរ៉ង់។

លោក Peskov បានបញ្ជាក់ថា៖«សំណើនេះ នៅតែត្រូវបានពិភាក្សា ហើយនៅតែពាក់ព័ន្ធ»។ លោកបានបន្ថែមថា៖ «ទោះជាយ៉ាងណា ស្ថានការណ៍កាន់តែស្មុកស្មាញជាមួយនឹងការចាប់ផ្តើមនៃអរិភាព»។

លោក Peskov បានកត់សម្គាល់ឃើញថា ការផ្ទុះឡើងនៃការប្រយុទ្ធគ្នានាពេលថ្មីៗនេះ បានកើតឡើងមុនពេលការរំពឹងទុកជុំបន្ទាប់នៃកិច្ចចរចាដោយប្រយោល ដែលសម្របសម្រួលដោយប្រទេសអូម៉ង់រវាងអ៊ីរ៉ង់ និងសហរដ្ឋអាមេរិក។

លោក Peskov បាននិយាយដោយសំដៅលើបញ្ហានុយក្លេអ៊ែរអ៊ីរ៉ង់ថា៖«រុស្ស៊ីនៅតែត្រៀមខ្លួន ដើម្បីធ្វើអ្វីដែលចាំបាច់ ដើម្បីដោះស្រាយមូលហេតុឫសគល់នៃវិបត្តិនេះ»។ លោកបានបន្ថែមថា៖ «ស្ថានការណ៍នេះ បានកើនឡើងយ៉ាងខ្លាំង ហើយជាការពិតបានធ្វើឲ្យមានបញ្ហាកាន់តែអាក្រក់ឡើង»។