ប្រទេសចិន នៅថ្ងៃអង្គារ (ទី១៧ ខែមិថុនា) នេះ បានចោទលោកប្រធានាធិបតី Donald Trump ថា បាន «ចាក់សាំងលើភ្លើងបន្ថែម» ជុំវិញជម្លោះដែលកំពុងតែឡើងកម្ដៅខ្លាំងទៅៗ រវាងអ៊ីរ៉ង់ និងអ៊ីស្រាអែលបន្ទាប់ពីមេដឹកនាំអាមេរិក បានព្រមានប្រជាជននៅទីក្រុងតេអេរ៉ង់ឲ្យ «ជម្លៀសចេញជាបន្ទាន់»។

បន្ទាប់ពីក្លាយជាសត្រូវនឹងគ្នារាប់ទសវត្សរ៍ និងមានសង្រ្គាមស្រមោលអូសបន្លាយពេលយ៉ាងយូរ អ៊ីស្រាអែលបានចាប់ផ្តើមយុទ្ធនាការវាយប្រហារផ្លូវអាកាសដ៏គួរឲ្យភ្ញាក់ផ្អើលមួយ កាលពីសប្តាហ៍មុន លើគោលដៅជាច្រើននៅទូទាំងប្រទេសអ៊ីរ៉ង់ ដោយផ្ដល់ហេតុផលថា ខ្លួនមានគោលបំណងទប់ស្កាត់គូអរិកុំឲ្យទទួលបានអាវុធបរមាណូ ជាមហិច្ឆតាដែលក្រុងតេអេរ៉ង់បដិសេធថា ខ្លួនមិនគិតចង់បាននោះឡើយ។

ការកើនឡើងនូវការប្រយុទ្ធគ្នាភ្លាមៗ បានបង្កឲ្យមានការភ័យខ្លាចពីការរីករាលដាលជម្លោះកាន់តែធំឡើងៗ ដោយលោក Trump បានជំរុញឲ្យអ៊ីរ៉ង់ត្រលប់ទៅតុចរចាវិញ បន្ទាប់ពីការវាយប្រហាររបស់អ៊ីស្រាអែលបានធ្វើឲ្យជាប់គាំងដល់កិច្ចចរចានុយក្លេអ៊ែរដែលកំពុងបន្តមាន។ លោក Trump ក៏បានចេញការព្រមានមិនធម្មតានៅលើបណ្ដាញសង្គម Truth Social របស់លោកថា៖ «អ្នករាល់គ្នាគួរតែជម្លៀសចេញពីក្រុងតេអេរ៉ង់ជាបន្ទាន់!»។

នៅពេលត្រូវបានសួរ អំពីការលើកឡើងរបស់លោក Trump អ្នកនាំពាក្យក្រសួងការបរទេសចិន លោក Guo Jiakun បាននិយាយថា៖ «ការផ្លុំឲ្យភ្លើងឆេះថែម ការចាក់សាំងលើភ្លើងបន្ថែម ការគំរាមកំហែង និងការដាក់សម្ពាធកាន់តែខ្លាំងឡើងៗ នឹងមិនជួយជំរុញឲ្យស្ថានការណ៍ថមថយនោះទេ ប៉ុន្តែផ្ទុយទៅវិញ វានឹងធ្វើឲ្យជម្លោះរីកកាន់តែធំឡើងៗ»។

អ្នកនាំពាក្យរូបនេះ បានបន្ថែមថា៖ «ភាគីចិនអំពាវនាវឲ្យភាគីពាក់ព័ន្ធទាំងអស់ ជាពិសេសប្រទេសដែលមានឥទ្ធិពលពិសេសលើអ៊ីស្រាអែល រែកពន់ការទទួលខុសត្រូវ ចាត់វិធានការជាបន្ទាន់ ដើម្បីកាត់បន្ថយភាពតានតឹង និងទប់ស្កាត់ជម្លោះកុំឲ្យរីករាលដាលកាន់តែធំឡើងៗ»៕