នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ ( Benjamin Netanyahu) បានប្រាប់អ្នកសារព័ត៌មាន លោកជឿជាក់ថា រដ្ឋាភិបាលអ៊ីរ៉ង់ មានភាពទន់ខ្សោយ ហើយអាចនឹងត្រូវផ្តួលរំលំ ក្នុងពេលឆាប់ៗនេះ។

លោកបានបន្តថា៖ «ជាការពិតណាស់ យើងអាចសង្ឃឹមថា ការផ្លាស់ប្តូរដ៏សំខាន់ៗ នឹងកើតឡើង នៅក្នុងប្រទេសអ៊ីរ៉ង់។ «ប្រជាជនអ៊ីរ៉ង់រាប់លាននាក់ បានឃើញពីបញ្ហានេះ ហើយនេះ មិនមែនជាករណីទី១ ទេ។ ថ្ងៃនេះ ពួកគេមានក្តីសង្ឃឹម។ ពួកគេយល់ថា របបនេះ គឺខ្សោយជាងអ្វីដែលពួកគេបានគិត។

លោក ណេតាន់យ៉ាហ៊ូ បានបន្តទៀតថា៖«គ្មាននរណាម្នាក់អាចទាយទុកជាមុនអំពីការបែកបាក់យ៉ាងឆាប់រហ័សនៃសហភាពសូវៀតនោះទេ។ មានមនុស្សមិនច្រើនទេដែលឃើញពីលទ្ធភាពនៃការផ្តួលរំលំរបប របស់ប្រធានាធិបតីស៊ីរីលោក បាសា អាល់អាសាដ (Bashar Assad) ត្រឹមប៉ុន្មានថ្ងៃមុនពេលវាកើតឡើង»។ 

កាលពីយប់ថ្ងៃទី ១៣ ខែមិថុនា អ៊ីស្រាអែល បានចាប់ផ្តើមប្រតិបត្តិការតោងើបរបស់ខ្លួន ដោយកំណត់គោលដៅលើកម្មវិធីនុយក្លេអ៊ែររបស់អ៊ីរ៉ង់។ អ៊ីរ៉ង់បានឆ្លើយតបក្នុងរយៈពេលតិចជាង ២៤ម៉ោង។ នៅថ្ងៃបន្ទាប់ ទីក្រុងតែលអាវីវ (Tel Aviv) និងទីក្រុងតេអេរ៉ង់ បានវាយប្រហារគ្នាម្តងទៀត។ ភាគីទាំងពីរ បានរាយការណ៍ពីជនរងគ្រោះ និងការខូចខាត ហើយបានទទួលស្គាល់ថា គ្រឿងបរិក្ខារមួយចំនួន ត្រូវបានរងការខូចខាត ប៉ុន្តែបាននិយាយថា ការខូចខាតមានកម្រិត។