អង្គការសុខភាពពិភពលោក (WHO) កាលពីថ្ងៃចន្ទបានបង្កើនយុទ្ធនាការគ្រប់គ្រងជំងឺគ្រុនឈាមទ្រង់ទ្រាយធំ នៅក្នុងខេត្ត Aden និង Lahj ភាគខាងត្បូងនៃប្រទេសយេម៉ែន ជាកន្លែងដែលការកើនឡើងនៃការឆ្លង ចាប់តាំងពីដើមឆ្នាំ ២០២៥ បានបន្ថែមសម្ពាធដល់វិបត្តិមនុស្សធម៌ធ្ងន់ធ្ងររួចទៅហើយនោះ។

អង្គការសុខភាពពិភពលោកបាននិយាយនៅក្នុងសេចក្តីថ្លែងការណ៍មួយតាមរយៈការិយាល័យរបស់ខ្លួនកាលពីថ្ងៃអាទិត្យថា ជំងឺគ្រុនឈាមច្រើនជាង ៣.៩០០ករណី និង មានអ្នកស្លាប់ ១៤នាក់ ត្រូវបានរាយការណ៍ នៅក្នុងខេត្តទាំងពីរ គិតត្រឹមខែមេសា។ តំបន់ទាំងពីរ គឺស្ថិតនៅក្រោមការគ្រប់គ្រងរបស់រដ្ឋាភិ   បាលដែលទទួលស្គាល់ដោយអន្តរជាតិ។

អង្គការWHO បាននិយាយនៅក្នុងការបង្ហោះនៅលើវេទិកាប្រព័ន្ធផ្សព្វផ្សាយសង្គម X ថា យុទ្ធនាការនេះមានគោលបំណងកាត់បន្ថយជំងឺដែលទាក់ទងនឹងជំងឺគ្រុនឈាម និងការស្លាប់ ខណៈពេលដែលកំណត់ការឆ្លង។

វិធានការសំខាន់ៗរួមមាន ការគ្រប់គ្រងប្រភពដង្កូវ ដើម្បីលុបបំបាត់កន្លែងបង្កាត់ពូជមូស ការអប់រំសុខភាពសហគមន៍ និងប្រតិបត្តិការបាញ់ថ្នាំតាមគោលដៅ នៅក្នុងតំបន់ដែលរងផលប៉ះពាល់។

ប្រទេសយេម៉ែន បានជាប់គាំងនៅក្នុងជម្លោះ ចាប់តាំងពីឆ្នាំ ២០១៤ នៅពេលដែលក្រុមសកម្មប្រយុទ្ធ ហ៊ួទី បានដណ្តើមកាន់កាប់ទីក្រុង Sanaa និងតំបន់ភាគខាងជើងផ្សេងទៀត ដែលជំរុញឲ្យក្រុមចម្រុះដឹកនាំដោយអារ៉ាប៊ីសាអ៊ូឌីត ធ្វើអន្តរាគមន៍ នៅឆ្នាំ ២០១៥ ដើម្បីស្ដាររដ្ឋាភិបាលដែលទទួលស្គាល់ដោយអន្តរជាតិ។