ក្រសួងសុខាភិបាលហ្កាហ្សា និយាយថា ការផ្លោងគ្រាប់កាំភ្លើងរបស់រថក្រោះអ៊ីស្រាអែល បានសម្លាប់ជនប៉ាឡេស្ទីនយ៉ាងហោច ៥១នាក់នៅថ្ងៃអង្គារនេះ ស្របពេលដែលពួកគេរង់ចាំរថយន្តដឹកជំនួយនៅទីក្រុង Khan Younis ស្ថិតនៅភាគខាងត្បូងតំបន់ហ្កាហ្សាស្រ្ទីប ក្នុងនោះមនុស្សរាប់រយនាក់ផ្សេងទៀត រងរបួស ។

មន្ទីរពេទ្យ Nasser ពេញដោយជនរងគ្រោះ ហើយបុគ្គលិកមន្ទីរពេទ្យ បានដាក់ពួកគេនៅលើដី ហើយនិងច្រករបៀង ដោយសារគ្មានកន្លែងទំនេរនៅក្នុងមន្ទីរពេទ្យ ។

អ្នកស្រុក និយាយថា រថក្រោះអ៊ីស្រាអែល បានផ្លោងគ្រាប់កាំភ្លើងធំលើហ្វូងមនុស្សដែលរង់ចាំរថយន្តដឹកជំនួយនៅតាមផ្លូវសំខាន់ ស្ថិតនៅភាគខាងកើតទីក្រុង Khan Younis ។ 

គ្រូពេទ្យបឋម និយាយថា មនុស្សយ៉ាងហោច ៥១នាក់ត្រូវបានសម្លាប់ និងមនុស្សប្រហែល ២០០នាក់ផ្សេងទៀត រងរបួស ក្នុងនោះមនុស្សយ៉ាងហោច ២០នាក់ ស្ថិតក្នុងស្ថានភាពធ្ងន់ធ្ងរ ។ នៅមិនទាន់មានសេចក្តីអត្ថាធិប្បាយភ្លាមៗនោះទេ ពីយោធាអ៊ីស្រាអែល ជុំវិញឧបទ្ទេវហេតុមួយនេះ ។

លោក Moayyid Quddasគឺជាជនប៉ាឡេស្ទីនមួយរូប និយាយថា ពួកយើងបានទៅរង់ចាំជំនួយដូចមនុស្សដទៃទៀតដែរ ដើម្បីបានស្បៀងអាហារសម្រាប់កូនៗរបស់ពួកយើង ។ ពួកយើងពុំបានមើលឃើញស្បៀងអាហារ ឬទឹកអស់រយៈពេល ៦ខែមកហើយ ។ ពួកគេនិយាយប្រាប់ពួកយើងថា មានម៉្សៅនៅទីនោះ ដូច្នេះហើយពួកយើងក៏បានទៅរង់ចាំ តែក្រោយមកបែរជាពួកយើងឃើញគ្រាប់រ៉ុក្កែតធ្លាក់លើពួកយើងទៅវិញ ។ ពួកយើងគឺជាជនស៊ីវិល ពួកយើងគ្មានអាវុធក្នុងដៃនោះទេ គឺគ្មានអ្វីសោះ ។ ពួកយើងគ្រាន់តែទៅយកអាហារសម្រាប់កូនៗរបស់ពួកយើង ដើម្បីផ្តល់អាហារដល់កូនៗរបស់ពួកយើង ពួកយើងអត់បានទទួលទានអស់រយៈពេល ៦ខែមកហើយ ពួកយើងហូបតែដីខ្សាច់ទេ ដោយសារឃ្លានខ្លាំងពេក ៕