នគរបាលឥណ្ឌូនេស៊ី និយាយនៅថ្ងៃអង្គារនេះថា មនុស្ស ២នាក់ ត្រូវបានចាប់ខ្លួន ជុំវិញការបាញ់សម្លាប់បុរសជនជាតិអូស្រ្តាលី និងធ្វើឲ្យបុរសជនជាតិអូស្រ្តាលីម្នាក់ទៀត រងរបួសនៅក្នុងការវាយប្រហារនៅពេលយប់លើភូមិគ្រឹះមួយកន្លែងលើកោះទេសចរណ៍បាលី ។

លោក Listyo Sigit Prabowo គឺជាស្នងការនគរបាលជាតិឥណ្ឌូនេស៊ី និយាយប្រាប់ក្រុមអ្នកសារព័ត៌មាននៅក្នុងព្រឹត្តការណ៍ថែទាំសុខភាពដោយពុំបានផ្តល់រឿងរ៉ាវលម្អិតនៃការចាប់ខ្លួននេះថា នគរបាលបានឃាត់ខ្លួនមនុស្សម្នាក់នៅរដ្ឋធានីហ្សាកាតា និងមនុស្សម្នាក់ទៀត ត្រូវបានចាប់ខ្លួនបាននៅបរទេស ។

គួរឲ្យដឹងថា ការបាញ់ប្រហារក្នុងភូមិគ្រឹះស្ថិតនៅដែនដី Badung បានកើតឡើងកាលពីថ្ងៃសៅរ៍ ទី ១៤ ខែមិថុនា ក្រោយយប់រំលងអធ្រាត្រ ។

សារព័ត៌មានរដ្ឋ Antara រាយការណ៍ថា លោក Zivan Radmanovic វ័យ ៣២ឆ្នាំ បានស្លាប់នៅកន្លែងកើតហេតុ ខណៈលោក Sanar Ghanim វ័យ ៣៥ឆ្នាំ បានរងរបួសធ្ងន់ ។

អ្នកនាំពាក្យ Ariasandy និយាយថា នគរបាលកោះបាលី ត្រូវបានរំពឹងថា នឹងធ្វើសន្តិសីទសារព័ត៌មាន ដើម្បីផ្តល់រឿងរ៉ាវលម្អិតបន្ថែមទៀតពីករណីនេះ នៅព្រឹកថ្ងៃពុធស្អែក ៕