ស្ថាប័នអាកាសចរណ៍ឥណ្ឌូនេស៊ី បានប្រាប់ថា យន្តហោះដឹកអ្នកធ្វើធម្មយាត្រារាប់រយនាក់ត្រលប់ពីប្រទេសអារ៉ាប៊ីសាអ៊ូឌីតវិញ ត្រូវបានប្ដូរផ្លូវនៅក្នុងប្រទេសឥណ្ឌូនេស៊ី នៅថ្ងៃអង្គារ (ទី១៧ ខែមិថុនា) បន្ទាប់ពីការគំរាមកំហែងបំផ្ទុះគ្រាប់បែកតាមអ៊ីម៉ែល ត្រូវបានផ្ញើទៅអាជ្ញាធរ។

អគ្គនាយកដ្ឋានអាកាសចរណ៍ស៊ីវិល បានឲ្យដឹងថា ខ្លួនបានទទួលរបាយការណ៍ពីប្រតិបត្តិករអាកាសយានដ្ឋានរបស់ឥណ្ឌូនេស៊ី «ទាក់ទងនឹងការគំរាមកំហែងគ្រាប់បែកដែលផ្ញើដោយជនមិនស្គាល់អត្តសញ្ញាណតាមរយៈអ៊ីម៉ែល»។

ការផ្ញើអ៊ីម៉ែល នៅវេលាម៉ោង ៧:៣០ព្រឹក ម៉ោងក្នុងស្រុក មានការគំរាមកំហែង «បំផ្ទុះ» ជើងហោះហើរ SV 5276 របស់ក្រុមហ៊ុនហ៊ុនអាកាសចរណ៍ Saudia Airlines ដែលធ្វើដំណើរចេញពីទីក្រុង Jeddah របស់អារ៉ាប៊ីសាអ៊ូឌីត ទៅកាន់រដ្ឋធានីហ្សាការតារបស់ឥណ្ឌូនេស៊ី។

ក្រោយម៉ោង ១០ព្រឹក អ្នកបើកយន្តហោះបានបង្វែរការហោះហើរចេញពីគោលដៅទៅកាន់អាកាសយានដ្ឋានអន្តរជាតិ Soekarno-Hatta នៃទីក្រុងហ្សាការតា ដោយឆ្ពោះទៅកាន់អាកាសយានដ្ឋានអន្តរជាតិ Kualanamu ក្នុងទីក្រុង Medan ដែលជាទីក្រុងនៅលើកោះស៊ូម៉ាត្រា នៅភាគខាងលិចឥណ្ឌូនេស៊ី។ ជើងហោះហើរនេះ បានដឹកអ្នកធ្វើធម្មយាត្រាចំនួន ៤៤២នាក់ ក្នុងនោះបុរស ២០៧នាក់ និងស្ត្រី ២៣៥នាក់។

អង្គភាពអាកាសចរណ៍បានឲ្យដឹងនៅក្នុងសេចក្តីថ្លែងការណ៍របស់ខ្លួនថា អាកាសយានដ្ឋាន បានជម្លៀសអ្នកធ្វើធម្មយាត្រាចេញ ហើយអង្គភាពកម្ចាត់គ្រាប់បែក បានឡើងលើយន្តហោះ ដើម្បីស្វែងរកគ្រឿងផ្ទុះ៕