រដ្ឋមន្ត្រីការពារជាតិអ៊ីស្រាអែល លោក Israel Katz នៅថ្ងៃអង្គារ (ទី១៧ ខែមិថុនា) បានព្រមានមេដឹកនាំកំពូលរបស់អ៊ីរ៉ង់ លោក Ali Khamenei ថា រូបលោកអាចទទួលរងនូវជោគវាសនា «ស្រដៀងនឹង» ប្រធានាធិបតីអ៊ីរ៉ាក់ លោក Saddam Hussein ដែលត្រូវបានផ្តួលរំលំ ហើយក្រោយមក ត្រូវបានប្រហារជីវិត។

លោក Katz បានព្រមានថា លោក Khamenei ប្រឈមនឹងហានិភ័យនៃការមាន «ជោគវាសនាស្រដៀងនឹងលោក Saddam Hussein» ក្នុងអំឡុងពេលជួបជាមួយមេបញ្ជាការយោធា និងសន្តិសុខអ៊ីស្រាអែល។ នេះបើយោងតាមសេចក្តីថ្លែងការណ៍ពីការិយាល័យរបស់លោក។

លោក Katz ត្រូវបានដកស្រង់សម្តី ដែលបាននិយាយថា៖ «ខ្ញុំសូមព្រមានមេដឹកនាំផ្តាច់ការអ៊ីរ៉ង់កុំបន្តប្រព្រឹត្តឧក្រិដ្ឋកម្មសង្រ្គាម និងបាញ់មីស៊ីលសំដៅជនស៊ីវិលអ៊ីស្រាអែលទៀត។ លោកគួរតែចងចាំនូវអ្វីដែលបានកើតឡើង ចំពោះជនផ្តាច់ការ នៅក្នុងប្រទេសជិតខាងអ៊ីរ៉ង់ ដែលបានដើរតាមផ្លូវដូចគ្នាប្រឆាំងនឹងអ៊ីស្រាអែល»។

គួររំលឹកថា លោក Saddam ត្រូវបានផ្តួលរំលំនៅក្នុងការលុកលុយដឹកនាំដោយសហរដ្ឋអាមេរិក កាលពីឆ្នាំ២០០៣ ហើយក្រោយមកត្រូវបានគេចាប់ខ្លួន និងប្រហារជីវិត។ រដ្ឋបាលរបស់លោក បានបាញ់មីស៊ីលទៅកាន់ប្រទេសអ៊ីស្រាអែល ក្នុងអំឡុងសង្គ្រាមឈូងសមុទ្រឆ្នាំ១៩៩១ ហើយត្រូវបានចោទប្រកាន់ពីបទដំណើរការកម្មវិធីអាវុធនុយក្លេអ៊ែរសម្ងាត់៕