ជនប៉ាឡេស្ទីនរាប់ពាន់នាក់ បានជួបជុំគ្នានៅទីក្រុង Beit Lahiya ស្ថិតនៅភាគខាងជើងហ្កាហ្សា ដើម្បីទទួលបានការផ្គត់ផ្គង់ជំនួយរង់ចាំជាយូរ ដោយអ្នកខ្លះលើកប្រអប់ជំនួយដាក់លើខ្នង និងលើកដាក់លើទោចចក្រយាន ។

លោក Mohammed al-Dawor ដែលកំពុងកាន់ប្រអប់ជំនួយសម្រាប់កូនៗរបស់លោក និយាយថា លោកមានអារម្មណ៍ល្អ ១០០ដងច្រើនជាងបានទៅឋានសួគ៌ទៅទៀត ។

ក្រុមតាមដានភាពស្រេកឃ្លានសកល បាននិយាយកាលពីខែមុនថា ពលរដ្ឋកន្លះលាននាក់នៅតំបន់ហ្កាហ្សា ប្រឈមនឹងភាពអត់ឃ្លាន ។

ចាប់តាំងពីពេលនោះមក អ៊ីស្រាអែលដែលបានគ្រប់គ្រងការផ្គត់ផ្គង់ជំនួយចូលដែនដីមួយនេះ បានដកចេញការបិទច្រករយៈពេល ១១សប្តាហ៍លើការផ្គត់ផ្គង់ជំនួយ ប៉ុន្តែក្រុមជំនួយ និយាយថា វានៅមិនទាន់គ្រប់គ្រាន់ឈានដល់តម្រូវការនោះទេ ។

អ៊ីស្រាអែល បានដាក់ទំនួលខុសត្រូវការចែកចាយជំនួយអនុញ្ញាតឲ្យចូលតំបន់ហ្កាហ្សាទៅក្នុងកណ្តាប់ដៃមូលនិធិមនុស្សធម៌ហ្កាហ្សា(GHF)ដែលគាំទ្រដោយសហរដ្ឋអាមេរិក ។

អង្គការសហប្រជាជាតិ(UN) បានច្រានចោលផែនការមួយនេះ ដោយពួកគេនិយាយថា ការចែកចាយជំនួយរបស់មូលនិធិ GHF មិនគ្រប់គ្រាន់នោះទេ ហើយគ្រោះថ្នាក់ និងបំពានគោលការណ៍មនុស្សធម៌ ។

មុនពេលប្រព័ន្ធថ្មីត្រូវបានបង្កើតឡើង ជំនួយត្រូវបានចែកចាយដល់មនុស្ស ២,៣លាននាក់នៅតំបន់ហ្កាហ្សា ភាគច្រើនដោយទីភ្នាក់ងារ UNដូចជាទីភ្នាក់ងារ UNRWA ដែលបានដាក់ពង្រាយបុគ្គលិករាប់ពាន់នាក់នៅក្នុងតំបន់ហ្កាហ្សា ហើយនិងប្រតិបត្តិការទីតាំងចែកចាយជំនួយរាប់រយកន្លែងនៅក្នុងដែនដីបិទច្រកមួយនេះ ។

អ៊ីស្រាអែល បានអនុញ្ញាតឲ្យប្រតិបត្តិការជំនួយមានដែនកំណត់ដឹកនាំដោយ UN ចាប់ផ្តើមឡើងវិញនៅថ្ងៃទី ១៩ ខែឧសភា ។

កាលពីថ្ងៃអាទិត្យ COGATដែលជាទីភ្នាក់ងារសម្របសម្រួលជំនួយយោធាអ៊ីស្រាអែល និយាយថា ក្នុងសប្តាហ៍នេះ ពួកគេបានសម្របសម្រួលឲ្យចូលរថយន្តផ្ទុកជំនួយមនុស្សធម៌ ២៩២គ្រឿង មកពី UN និងសហគមន៍អន្តរជាតិ រួមទាំងស្បៀងអាហារ និងម៉្សៅ ទៅក្នុងតំបន់ហ្កាហ្សា ៕