ភ្នំពេញ​ ៖ ពេញមួយថ្ងៃនេះតុលាការបានធ្វើការសាកសួរក្រុម វិល្មាម គ័ង សរុបចំនួន៤នាក់ ដោយមិនទាន់សម្រេចចោទប្រកាន់ជាផ្លូវការនូវបទល្មើសអ្វីខ្លះនៅឡើយទេ មកដល់ព្រលប់នេះ ហើយតុលាការនឹងបន្តធ្វើការសាកសួរបន្តទៀតនៅថ្ងៃអាទិត្យស្អែក។

នៅថ្ងៃទី២៥ ខែធ្នូ ឆ្នាំ២០២១នេះ លោក ស៊ិត វណ្ណៈ ព្រះរាជអាជ្ញារង អមសាលាដំបូងរាជធានីភ្នំពេញបានបន្តសាកសួរ William Guang ប្រធានគណបក្សខ្មែរក្រោក និងបក្ខពួក៣នាក់ទៀត ដោយពេញមួយថ្ងៃនេះតំណាងអយ្យការនៅមិនទាន់សម្រេចចោទប្រកាន់នូវបទល្មើសណាមួយនៅឡើយទេ។ បើតាមប្រភពព័ត៌មានពីតុលាការបានឲ្យដឹងថា តំណាងអយ្យការនឹងបន្តធ្វើការសាកសួរ William Guang នៅថ្ងៃស្អែកបន្តទៀត ដោយនៅល្ងាចថ្ងៃទី២៥ធ្នូនេះតំណាងអយ្យការបានបង្គាប់ឲ្យកម្លាំងសមត្ដកិច្ចនាំខ្លួនមនុស្សទាំង៤នាក់ទៅកាន់បញ្ជាការដ្ឋានកងរាជអាវុធហត្ថវិញ នឹងត្រូវនាំខ្លួនមកសាកសួរបន្តនៅថ្ងៃស្អែក។

លោក ប្លង់ សុផល អ្នកនាំពាក្យតំណាងអយ្យការ អមសាលាដំបូងរាជធានីភ្នំពេញបានឲ្យដឹងនៅព្រលប់ថ្ងៃទី២៥ ខែធ្នូ ឆ្នាំ២០២១ថា សំណុំរឿងខាងលេី​ ត្រូវបានតំណាងអយ្យការបេីកការស៊េីបសួរ​ពីបទ​ លួចមានស្ថានទម្ងន់ទោស​ សមគំនិតក្នុងអំពេីលួចដោយមានស្ថានទម្ងន់ទោស​ បទកាន់កាប់អាវុធដោយគ្មានការអនុញ្ញាត​ និងបទក្លែងឯកសារសាធារណៈ​ តាមមាត្រា​ ២៩​ មាត្រា​ ៣៥៣​ មាត្រា​ ៣៥៧​ មាត្រា​ ៤៩០​ និងមាត្រា​ ៦២៩​ នៃក្រមព្រហ្មទណ្ឌ​។

សូមជំរាបថា ករណីប្លន់ផ្ទះអ្នកលក់ឡេអនឡាញ អ៊ាន សៀវម៉ី បានកើតឡើងកាលពីវេលាម៉ោងប្រមាណ១០និង៤០នាទី ថ្ងៃទី១៩ ខែធ្នូ ឆ្នាំ២០២១ ដែលក្រុមចោរមានគ្នា៥នាក់ ប្រដាប់ដោយអាវុធគ្រប់ដៃ និងយកបានគ្រឿងពេជ្រទៅមួយចំនួន គេចខ្លួនបានត្រឹមតែមួយយប់ ក៏ត្រូវបានអាវុធហត្ថរាជធានីភ្នំពេញ ក្រោមការចង្អុលបង្ហាញពីលោកនាយឧត្តមសេនីយ៍ សៅ សុខា អគ្គមេបញ្ជាការរង កងយោធពលខេមរភូមិន្ទ មេបញ្ជាការ កងរាជអាវុធហត្ថលើផ្ទៃប្រទេស និងបានទទួលការអនុញ្ញាតពីឯកឧត្តមព្រះរាជអាជ្ញា ច្រឹងខ្មៅ ចាត់ឲ្យលោកព្រះរាជអាជ្ញារង សិត វណ្ណៈ សម្របសម្រួល និងដឹកនាំបញ្ជាកម្លាំងដោយ លោកឧត្តមសេនីយ៍ឯក រ័ត្ន ស្រ៊ាង មេបញ្ជាការរង កងរាជអាវុធហត្ថលើផ្ទៃប្រទេស និងជា មេបញ្ជាការកងរាជអាវុធហត្ថរាជធានីភ្នំពេញ បានធ្វើការបង្ក្រាបដល់សម្បុកមេក្លោងធំ ដែលជាប្រធានគណបក្សខ្មែរក្រោក និងបានប្រមូលយកគ្រឿងពេជ្រប្រគល់ជូនជនរងគ្រោះវិញ ហើយជនសង្ស័យបានបញ្ជូនដល់តុលាការហើយ។

តាមចម្លើយរបស់ឈ្មោះ សុខ សុវណ្ណវឌ្ឍនាសាប៊ុង ហៅសុខ សុវណ្ណវឌ្ឍនាសារពង្ស ហៅ វិល្លាម គ័ង ដែលជាមេក្លោង និងជាអ្នក រៀបចំផែនការ បានបញ្ជាក់ថា សកម្មភាពចូលប្លន់ផ្ទះអ្នកលក់ឡេអនឡាញ អ៊ាន សៀវម៉ី នេះ គឺខ្លួនរៀបផែនការមុនតែមួយថ្ងៃទេ ដោយចេញធ្វើសកម្មភាពចំនួន ០៥នាក់ ខ្លួនជាអ្នកដឹកនាំផ្ទាល់តែម្តង មូលហេតុដែលនាំឲ្យខ្លួនសម្រេចចិត្តប្លន់គឺដោយសារ

ទី១ គឺសព្វថ្ងៃខ្លួនខ្វះខាតលុយកាក់ទ្រទ្រង់ជីវភាពនិងបក្ស ជាក់ស្តែងរថយន្តដែលខ្លួនជិះ គឺបង់រំលោះមិនទាន់ដាច់នៅឡើយ ហើយផ្ទះដែលខ្លួន រស់នៅ គឺជួលក្នុងតម្លៃ ២៥០០$ក្នុង១ខែ ជំពាក់ឈ្នួលផ្ទះគេ២ខែហើយ ចំណែកស្នាក់ការបក្សចំនួន១៦ខេត្ត ក៏មិនមានប្រាក់បង់ឈ្នួលផ្ទះឲ្យគេ ព្រមទាំងជំពាក់បំណុលគេជុំទិសទៀតផង។ 

ទី២ គឺខ្លួនមានទស្សន: អ្នកក្រនិយម ជ្រិញពួកអ្នកមាន ឡាយតាម Facebook បង្អួតទ្រព្យសម្បត្តិ ដូចនេះ ក៏កើតចិត្តចង់ ព្រមានដល់អ្នកមាន មួយចំនួនដែលមានចរិតបែបនេះ ។

កន្លងមកពួកខ្លួនបានធ្វើសកម្មភាពប្លន់ចំនួន០២លើក

ទី១គឺនៅថ្ងៃទី២៥ ខែវិច្ឆិកា ឆ្នាំ២០២១ បានធ្វើសកម្មភាពប្លន់ ម្ចាស់បុរីម៉នដានី នៅស្រុកគងពិសី ខេត្តកំពង់ស្ពឺ តែមិនបានសម្រេច ព្រោះនៅថ្ងៃធ្វើសកម្មភាព ស្រាប់តែជនរងគ្រោះមិនបាននៅក្នុងឡានដែលពួកខ្លួនបានកាក់ប្លន់ ក៏ក្លែងធ្វើជាសួរនាំក្នុងនាមសមត្ថកិច្ច ហើយពេលនោះខ្លួនមិនបានចូលរួមទេ គឺឲ្យតែកូនចៅ ០៥នាក់ អាវុធវែង០១ដើម អាវុធខ្លី០២ដើម និងក្លែងឯកសណ្ឋានសមត្ថកិច្ច ចុះទៅធ្វើសកម្មភាព។

ទី២គឺនៅថ្ងៃទី១៩ ខែធ្នូ ឆ្នាំ២០២១ ខ្លួនបានប្រើរូបភាពដូចលើកទី១ដែរ គឺក្លែងឯកសណ្ឋានសមត្ថកិច្ច និងក្លែងដីកាបង្គាប់ឲ្យនាំខ្លួន ចុះទៅធ្វើសកម្មភាព ប្លន់យកទ្រព្យសម្បត្តិ នៅផ្ទះអ្នកលក់ឡេអនឡានឈ្មោះ អ៊ាន សៀវម៉ី បានសម្រេចដោយប្រមូលបានគ្រឿងពេជ្រមួយចំនួន តែរំលងបានតែ១យប់ ក៏ត្រូវសមត្ថកិច្ចអាវុធហត្ថរាជធានីភ្នំពេញចុះបង្ក្រាបដល់ផ្ទះ ដោយឃាត់ខ្លួនមនុស្សបានចំនួន១២នាក់ អាវុធវែងខ្លីចំនួន០៥ដើមភ្លាមៗ និងគ្រឿងពេជ្រជាច្រើនឈុតត្រឡប់មកវិញ ក្រោយមកឆែកឃើញអាវុធ០១ដើមទៀត លាក់នៅមាត់លូ សរុបដកហូតបានអាវុធ ០៦ដើម។ ជាមួយគ្នានេះខាងនគរបាលក៏បានឃាត់ខ្លួនបក្ខពួកគេចំនួន២នាក់ទៀត ដែលកំពុងជិះរថយន្តគេចពីការតាមចាប់របស់សមត្ថកិច្ច និងថកហូតបានរថយន្តដែលពួកគេជិះធ្វើសកម្មភាពប្លន់ផងដែរ៕

អត្ថបទ ៖ ប្រាក់ វ៉ាន់ដា