អង្គការទេសន្តរប្រវេសន៍អន្តរជាតិ(IOM) បាននិយាយថា ជនភៀសខ្លួន និងអន្តោប្រវេសន៍យ៉ាងហោចណាស់ ៦០នាក់ ត្រូវគេបារម្ភថាបាត់ខ្លួន និងលង់ទឹកស្លាប់ក្នុងសមុទ្រ បន្ទាប់ពីការលិចទូកពីរគ្រឿងក្បែរឆ្នេរសមុទ្ររបស់ប្រទេសលីប៊ី ក្រោយព្យាយាមឆ្លងសមុទ្រដ៏គ្រោះថ្នាក់ទៅកាន់អឺរ៉ុប។

លោក Othman Belbeisi នាយកប្រចាំតំបន់សម្រាប់មជ្ឈិមបូព៌ា និងអាហ្រ្វិកខាងជើង បាននិយាយថា ដោយមានការភ័យខ្លាចថាមានមនុស្សស្លាប់រាប់សិបនាក់ អង្គការទេសន្តរប្រវេសន៍អន្តរជាតិ ជាថ្មីម្តងទៀតកំពុងជំរុញសហគមន៍អន្តរជាតិឱ្យបង្កើនប្រតិបត្តិការស្វែងរក និងជួយសង្គ្រោះ និងធានាសុវត្ថិភាពដែលអាចព្យាករណ៍បានសម្រាប់អ្នកនៅរស់រានមានជីវិត។

ទីភ្នាក់ងារអង្គការសហប្រជាជាតិបាននិយាយថា ការលិចកទូកមួយគ្រឿងបានកើតឡើងកាលពីថ្ងៃទី ១២ ខែមិថុនា នៅជិតកំពង់ផែ Alshab ក្នុងទីក្រុង Tripolitania របស់លីប៊ី។ អ្នកនៅរស់រានមានជីវិតតែ ៥ នាក់ប៉ុណ្ណោះត្រូវបានរកឃើញ ហើយមនុស្ស ២១ នាក់ត្រូវបានរាយការណ៍ថាបាត់ខ្លួន។ ក្នុងចំណោមអ្នកស្លាប់ដែលត្រូវគេបារម្ភនោះ មានជនជាតិអេរីត្រេ ៦នាក់ ក្នុងនោះមានស្ត្រី ៣នាក់ និងកុមារ ៣នាក់ ប៉ាគីស្ថាន ៥នាក់ អេហ្ស៊ីប ៤នាក់ និងបុរសស៊ូដង់ ២នាក់។ អត្តសញ្ញាណមនុស្ស៤នាក់ទៀតនៅមិនទាន់ដឹងនៅឡើយ ។ 

ឧបទ្ទវហេតុទីពីរបានកើតឡើងនៅថ្ងៃទី១៣មិថុនាចម្ងាយប្រហែល៣៥ គីឡូម៉ែត្រ ភាគខាងលិចនៃទីក្រុង Tobruk ប្រទេសលីប៊ី។ យោងតាមអ្នករស់រានមានជីវិតតែម្នាក់គត់ ដែលត្រូវបានជួយសង្គ្រោះដោយអ្នកនេសាទ បានឲ្យដឹងថា មនុស្ស៣៩នាក់កំពុងបាត់ខ្លួន។

មនុស្សយ៉ាងហោចណាស់៧៤៣នាក់បានស្លាប់រហូតមកដល់ពេលនេះ ដែលប៉ុនប៉ងឆ្លងសមុទ្រមេឌីទែរ៉ាណេទៅកាន់ទ្វីបអឺរ៉ុប រួមទាំង៥៣៨នាក់នៅលើផ្លូវមេឌីទែរ៉ាណេកណ្តាល ដែលនៅតែត្រូវបានគេស្គាល់យ៉ាងច្បាស់ថាជាផ្លូវដ៏មានគ្រោះថ្នាក់បំផុតសម្រាប់ការធ្វើអន្តោប្រវេសន៍ក្នុងពិភពលោក៕