ប្រធានាធិបតីសហរដ្ឋអាមេរិក លោក Donald Trump កាលពីថ្ងៃអង្គារ បាននិយាយថា ប្រទេសជប៉ុនកំពុង «មានភាពតានតឹង» នៅក្នុងកិច្ចចរចាពាណិជ្ជកម្ម ហើយសហភាពអឺរ៉ុប ពុំទាន់បានផ្តល់នូវអ្វីដែលលោកចាត់ទុកថាជាកិច្ចព្រមព្រៀងដោយយុត្តិធម៌នៅឡើយទេ ខណៈក្រុមដែលដឹកនាំដោយរដ្ឋមន្ត្រីក្រសួងរតនាគារ លោក Scott Bessent បានស្ថិតនៅក្នុងកិច្ចប្រជុំ G7 នៅប្រទេសកាណាដា ដើម្បីបន្តធ្វើការលើបញ្ហាពាណិជ្ជកម្ម បន្ទាប់ពីលោកTrump បានចាកចេញមុនគេ។ លោក Trump បាននិយាយទៅកាន់អ្នកសារព័ត៌មាននៅលើយន្តហោះ Air Force One ថាសហភាពអឺរ៉ុប នឹងចាំបាច់ត្រូវផ្តល់ឱ្យទីក្រុងវ៉ាស៊ីនតោននូវ «កិច្ចព្រមព្រៀងដ៏ល្អ» បើមិនដូច្នេះទេត្រូវប្រឈមការដំឡើងពន្ធកាន់តែខ្ពស់។

លោក Trump បាននិយាយបន្ទាប់ពីចាកចេញពីកិច្ចប្រជុំកំពូលក្រុមប្រទេសមានសេដ្ឋកិច្ចរីកលូតលាស់ទាំង៧ ឬG7 មុនគេ ដើម្បីផ្តោតការយកចិត្តទុកដាក់លើតំបន់មជ្ឈិមបូព៌ា។ លោកបានប្រាប់អ្នកសារព័ត៌មាន ថា លោក Bessent បន្តនៅ ក្នុងប្រទេសកាណាដា ដើម្បីចរចាជាមួយសមភាគីនានា ស្តីពីពាណិជ្ជកម្ម។ មន្ត្រីសេតវិមានបាននិយាយថា អ្នកតំណាងពាណិជ្ជកម្មអាមេរិក លោក Jamieson Greer និងនាយកក្រុមប្រឹក្សាសេដ្ឋកិច្ចជាតិ លោក Kevin Hassett ក៏បានបន្តនៅក្នុងប្រទេសកាណាដា ហើយនឹងជួបជាមួយសមភាគីច្រើននាក់។

ប្រធានគណៈកម្មការអឺរ៉ុប លោកស្រី Ursula von der Leyen បានប្រាប់អ្នកសារព័ត៌មាននៅខាងក្រៅកិច្ចប្រជុំ G7 ថា គោលបំណង នៅតែឈានដល់កិច្ចព្រមព្រៀងមួយ មុនពេលការដំឡើងពន្ធបដិការកាន់តែខ្ពស់ជាងនេះ ដែលនឹងចូលជាធរមាននៅថ្ងៃទី៩ ខែកក្កដា បន្ទាប់ពីការផ្អាករយៈពេល៩០ថ្ងៃ។