សមាជិកនៃសហគមន៍សាសនាស៊ីកនៅប្រទេសកាណាដា បានហែកទង់ជាតិឥណ្ឌាជាបំណែកតូចៗនៅទីក្រុង Calgary កាលពីថ្ងៃអង្គារ ដើម្បីតវ៉ាប្រឆាំងការអញ្ជើញរបស់ទីក្រុង Ottawa ចំពោះនាយករដ្ឋមន្រ្តី លោក Narendra Modi ឱ្យមកចូលរួមក្នុងកិច្ចប្រជុំកំពូល G7 នៅខេត្ត Alberta។

នាយករដ្ឋមន្ត្រីកាណាដា លោក Mark Carney បានអញ្ជើញលោក Modi ទោះបីជាប្រទេសឥណ្ឌា ពុំមែនជាសមាជិក G7 ក៏ដោយ ដើម្បីចូលរួមកិច្ចប្រជុំកំពូលដែលបានចាប់ផ្តើមកាលពីថ្ងៃអាទិត្យ ទី១៥ ខែមិថុនា ជាភ្ញៀវ។ វាគឺជាដំណើរទស្សនកិច្ចលើកដំបូងរបស់លោក Modi ទៅកាន់ប្រទេសកាណាដា ក្នុងរយៈពេលមួយទសវត្សរ៍ មកនេះ និងជាការសាកល្បងផ្នែកការទូតសម្រាប់ លោក Carney ដែលជាអ្នកចាប់ផ្តើមថ្មីផ្នែកនយោបាយ។

អ្នកស្រី Jasbir Johl បុគ្គលិកទូរគមនាគមន៍ចូលនិវត្តន៍អាយុ៦២ឆ្នាំ មកពីក្រុង Chesteremere ស្រុក Alberta បាននិយាយថា អ្នកស្រីកំពុងតវ៉ាប្រឆាំងនឹងការគាបសង្កត់។ អ្នកស្រី Johl បាននិយាយថា «យើងជាមនុស្សគ្មានរដ្ឋ។ យើងត្រូវបានគេគាបសង្កត់នៅគ្រប់ទីកន្លែង»។ នៅពេលយើងរស់នៅក្នុងរដ្ឋ Punjab ពិតណាស់យើងត្រូវបានគេគាបសង្កត់ ដោយសារតែយើងស្ថិតនៅក្រោមការគ្រប់គ្រងផ្ទាល់របស់រដ្ឋាភិបាលឥណ្ឌា យើងត្រូវបានគេគាបសង្កត់សូម្បីតែនៅក្នុងប្រទេសផ្សេងទៀតដូចជាប្រទេសកាណាដា។ ទំនាក់ទំនងរបស់ប្រទេសកាណាដា ជាមួយឥណ្ឌាមានភាពតានតឹងចាប់តាំងពីអតីតនាយករដ្ឋមន្ត្រីកាណាដា លោក Justin Trudeau ក្នុងឆ្នាំ 2023 បានចោទប្រកាន់រដ្ឋាភិបាលឥណ្ឌាថាមានជាប់ពាក់ព័ន្ធនៅថ្ងៃទី១៨ ខែមិថុនា ឆ្នាំ២០២៣ ពីបទឃាតកម្មលើ លោក Hardeep Singh Nijjar មេដឹកនាំផ្តាច់ខ្លួន សាសនាស៊ីក(Sikh) នៅក្នុងប្រទេសកាណាដា។ រដ្ឋាភិបាលរបស់លោក Modi បានបដិសេធការជាប់ពាក់ព័ន្ធក្នុងការសម្លាប់លោក Nijjar និងបានចោទប្រកាន់ប្រទេសកាណាដា ថាបានផ្តល់ទីជម្រកសុវត្ថិភាពសម្រាប់ក្រមផ្តាច់ខ្លួនសាសនាស៊ីក។