យោងតាមប្រភពមន្ត្រីអាមេរិក ៣រូបបានឱ្យដឹងថា រដ្ឋបាលរបស់លោកប្រធានាធិបតី Donald Trump ក្នុងប៉ុន្មានសប្តាហ៍ថ្មីៗនេះ បានរុះរើក្រុមការងារអន្តរទីភ្នាក់ងារមួយ ដែលបានបង្កើតឡើងជាយុទ្ធសាស្ត្រសម្រាប់ដាក់សម្ពាធលើរុស្ស៊ី ឱ្យពន្លឿនកិច្ចចរចាសន្តិភាពជាមួយអ៊ុយក្រែន។

មន្ត្រីទាំងនេះលើកឡើងថា កិច្ចខិតខំប្រឹងប្រែងសម្ពាធ ដែលបង្កើតឡើងនៅដើមនិទាឃរដូវនេះ បានបាត់បង់កម្លាំងនៅក្នុងខែឧសភា ខណៈស្ថានការណ៍បានបង្ហាញកាន់តែច្បាស់ចំពោះអ្នកចូលរួមថា លោក Trump មិនចាប់អារម្មណ៍ក្នុងការប្រកាន់ជំហរតឹងរ៉ឹងបន្ថែមទៀតចំពោះទីក្រុងមូស្គូទេ។

លោក Trump បានសន្យាក្នុងពេលយុទ្ធនាការថានឹងបញ្ចប់សង្រ្គាមនៅអ៊ុយក្រែននៅថ្ងៃដំបូងនៃអាណត្តិប្រធានាធិបតីរបស់ខ្លួន ប៉ុន្តែក្នុងប៉ុន្មានខែថ្មីៗនេះ លោកមានការខកចិត្តកាន់តែខ្លាំងឡើងដែលការជំរុញរបស់លោកមិនមានលទ្ធផលអ្វីទាល់តែសោះ។ លោកក៏ចាប់ផ្តើមនិយាយថា សហរដ្ឋអាមេរិក អាចនឹងបោះបង់ចោលនូវការខិតខំរបស់ខ្លួនលើការសម្របសម្រួលសន្តិភាពអ៊ុយក្រែន។

មន្ត្រីទាំងនោះបន្តថា ដោយមើលឃើញពីការគំរាមដើរចេញនេះ កិច្ចការរបស់ក្រុមអន្តរទីភ្នាក់ងារហាក់ដូចជាមិនមានភាពចាំបាច់កាន់តែខ្លាំងឡើង។ មន្ត្រីនិយាយថា "ក្រុមនេះបានបាត់បង់កម្លាំងហើយឆ្ពោះទៅរកទីបញ្ចប់របស់ខ្លួន ដោយសារតែអារម្មណ៍លោក Trump មិននៅទីនោះទៀតទេ”។

អវត្តមានរបស់ក្រុមការងារនេះ ទំនងជានឹងធ្វើឱ្យក្ដីបារម្ភរបស់សម្ព័ន្ធមិត្តអឺរ៉ុបកាន់តែស៊ីជម្រៅ ជុំវិញការផ្សះផ្សារបស់លោក Trump នាពេលកន្លងមកចំពោះរុស្ស៊ី និងការស្ទាក់ស្ទើររបស់លោក្នុងការបង្ហាញការគាំទ្រពេញទំហឹងសម្រាប់អ៊ុយក្រែន នៅមុនកិច្ចប្រជុំកំពូលដ៏សំខាន់នៃសម្ព័ន្ធមិត្តណាតូនៅចុងខែនេះ៕