ក្រុមអ្នកស៊ើបអង្កេតនៅឥណ្ឌា កំពុងសិក្សាប្រអប់ខ្មៅនៃយន្តហោះប៊ូអ៊ីងប្រភេទ 787-8 Dreamliner បន្ទាប់ពីបានយកចេញពីបំណែកយន្តហោះ ដើម្បីបញ្ជាក់ពីមូលហេតុនៃសោកនាដកម្មដ៏អាក្រក់កាលពីសប្តាហ៍មុន ដែលបានបណ្តាលឱ្យមនុស្សប្រមាណជាង ២៧០នាក់បានស្លាប់។

ប្រអប់ខ្មៅទាំងនោះនឹងផ្តល់ទិន្នន័យការសន្ទនាក្នុងបន្ទប់កាប៊ីនយន្តហោះ និងទិន្នន័យដែលទាក់ទងនឹងម៉ាស៊ីនរបស់យន្តហោះ រួមទាំងកំណត់ការគ្រប់គ្រង ទៅកាន់អ្នកស៊ើបអង្កេត និងជួយពួកគេក្នុងការកំណត់រកមូលហេតុពិតនៃគ្រោះថ្នាក់។

គួររម្លឹកថា យន្តហោះរបស់ក្រុមហ៊ុនអាកាសចរណ៍ Air India ប្រភេទប៊ូអ៊ីង 787-8 Dreamliner បានធ្លាក់លើអគារស្នាក់នៅមួយកន្លែងនៅមហាវិទ្យាល័យវេជ្ជសាស្ត្រ ភ្លាមៗបន្ទាប់ពីហោះចេញពីក្រុង Ahmedabad ភាគខាងលិច។ មានតែអ្នកដំណើរម្នាក់ប៉ុណ្ណោះដែលរួចជីវិតពី ខណៈមនុស្ស ២៤១នាក់លើយន្តហោះ និងប្រមាណជិត ៣០នាក់នៅលើដី ត្រូវបានសម្លាប់ក្នុងមហន្តរាយអាកាសចរណ៍ដ៏អាក្រក់បំផុតមួយរបស់ឥណ្ឌា ក្នុងពេលជាច្រើនទសវត្សរ៍។

ក្រុមអ្នកជំនាញមកពីការិយាល័យស៊ើបអង្កេតគ្រោះថ្នាក់យន្តហោះឥណ្ឌា កំពុងស៊ើបឧប្បត្តិហេតុនេះ ដោយមានជំនួយពីសហរដ្ឋអាមេរិក ចក្រភពអង់គ្លេស និងក្រុមមន្ត្រីមកពីក្រុមហ៊ុនប៊ូអ៊ីង។ ស្ថាប័ននិយតកម្មអាកាសចរណ៍ឥណ្ឌា និយាយថា យន្តហោះនោះបានប្រកាសសញ្ញាអាសន្នដែលគំរាមកំហែងដល់អាយុជីវិតនៅមុនពេលធ្លាក់។

លោក Amit Singh អតីតអ្នកបើកយន្តហោះ និងជាអ្នកជំនាញខាងអាកាសចរណ៍ បាននិយាយថា ការទាញយកទិន្នន័យហោះហើរ និងឧបករណ៍ថតសំឡេងរបស់កាប៊ីនយន្តហោះ ឬហៅថាប្រអប់ខ្មៅនោះ មានសារៈសំខាន់ណាស់ក្នុងការប្រមូលផ្តុំគ្នាតាមលំដាប់លំដោយនៃព្រឹត្តិការណ៍។ រដ្ឋាភិបាលឥណ្ឌាបានបង្កើតគណៈកម្មការកម្រិតខ្ពស់ដាច់ដោយឡែកមួយដើម្បីពិនិត្យមើលមូលហេតុនាំឱ្យមានការធ្លាក់ ហើយគណៈកម្មាការនេះត្រូវបានរំពឹងថានឹងចេញរបាយការណ៍បឋមក្នុងពេលបីខែបន្ទាប់៕