សារព័ត៌មាន The Wall Street Journal បានរាយការណ៍ ដោយដកស្រង់សម្តីប្រភពថា ពុំទាន់មានការសម្រេចចិត្តលើការវាយប្រហារទៅលើប្រទេសអ៊ីរ៉ង់ ត្រូវបានធ្វើឡើង នៅឯកិច្ចប្រជុំរបស់ប្រធានាធិបតីអាមេរិក លោក ដូណាល់ ត្រាំ (Donald Trump) ជាមួយទីប្រឹក្សាជាន់ខ្ពស់របស់លោក នៅក្នុងបន្ទប់ចារកម្មរបស់សេតវិមាននោះទេ។ 

យោងតាមប្រភពបានឲ្យដឹងថា «លោក ត្រាំ កំពុងពិចារណាជម្រើសជាច្រើនរួមទាំងការវាយប្រហារដ៏មានសក្តានុពលរបស់សហរដ្ឋអាមេរិកប្រឆាំងនឹងអ៊ីរ៉ង់»។

នាពេលមុននេះ សារព័ត៌មាន ABC News បានរាយការណ៍ថា ក្នុងរយៈពេល ២៤ ទៅ ៤៨ ម៉ោងខាងមុខ គឺសំខាន់ណាស់សម្រាប់ជម្លោះអ៊ីស្រាអែល និងអ៊ីរ៉ង់ ខណៈដែលទីក្រុងវ៉ាស៊ីនតោន កំពុងកំណត់ថាតើដំណោះស្រាយការទូត អាចទៅរួច ឬអត់ ប្រសិនបើមិនអាច លោកប្រធានាធិបតី អាចងាកទៅរកវិធានការ យោធា។

យោងតាមទូរទស្សន៍ Channel 12 របស់អ៊ីស្រាអែល មន្ត្រីអ៊ីស្រាអែលជឿថា សហរដ្ឋអាមេរិក គឺជិតចូលរួមប្រតិបត្តិការរបស់រដ្ឋជ្វីហ្វហើយ។

កាលពីយប់ថ្ងៃទី ១៣ ខែមិថុនា អ៊ីស្រាអែល បានចាប់ផ្តើមប្រតិបត្តិការតោងើបរបស់ខ្លួន ដោយកំណត់គោលដៅលើកម្មវិធីនុយក្លេអ៊ែររបស់អ៊ីរ៉ង់។ អ៊ីរ៉ង់បានឆ្លើយតបក្នុងរយៈពេលតិចជាង ២៤ម៉ោង។ អ៊ីស្រា  អែលនិងអ៊ីរ៉ង់ បានវាយប្រហារគ្នាម្តងទៀត នៅប៉ុន្មានថ្ងៃក្រោយមក។