ប្រធានាធិបតីចិន លោក ស៊ី ជីនពីង (Xi Jinping) បានអំពាវនាវឲ្យលើកកម្ពស់ស្មារតីចិន-អាស៊ីកណ្តាល ដើម្បីឲ្យមានកិច្ចសហប្រតិបត្តិការប្រកបដោយគុណភាពខ្ពស់ នៅក្នុងតំបន់ ដោយការលើកឡើងនេះមាននៅក្នុងសុន្ទរកថាគន្លឹះរបស់លោក នៅឯកិច្ចប្រជុំកំពូលអាស៊ីកណ្តាលលើកទី២ ក្នុងរដ្ឋធានី Astana របស់ប្រទេសកាហ្សាក់ស្ថាន កាលពីថ្ងៃអង្គារ (ទី១៧ ខែមិថុនា)។

កិច្ចប្រជុំកំពូលនេះ ធ្វើឡើងនៅវិមានឯករាជ្យ ក្នុងទីក្រុង Astana ក្រោមអធិបតីភាពប្រធានាធិបតីកាហ្សាក់ស្ថាន Kassym-Jomart Tokayev (ខាស៊ីម ចូម៉ាត តូខាយ៉ីវ) ហើយមានការចូលរួមពីលោកប្រធានាធិបតី ស៊ី ប្រធានាធិបតីកៀហ្ស៊ីស៊ីស្ថាន (លោក Sadyr Japarov) ប្រធានាធិបតីតាហ្ស៊ីគីស្ថាន (លោក Emomali Rahmon) ប្រធានាធិបតីតួកម៉េនីស្ថាន (លោក Serdar Berdimuhamedov) និងប្រធានាធិបតីអ៊ូសបេគីស្ថាន (លោក Shavkat Mirziyoyev)។

អំឡុងកិច្ចប្រជុំនោះ ប្រមុខរដ្ឋទាំងអស់បានព្រមព្រៀងគាំទ្រលើកកម្ពស់ស្មារតីចិន-អាស៊ីកណ្តាល លើកស្ទួយភាពជាអ្នកជិតខាងល្អ និងមិត្តភាពជានិរន្តរ៍ ហើយរួមគ្នាធ្វើឲ្យប្រសើរឡើងនូវសមិទ្ធិផលនានាជាបន្តបន្ទាប់ ដើម្បីកសាងសហគមន៍ចិន-អាស៊ីកណ្តាលដែលមានអនាគតរួមគ្នា។

អំឡុងពេលថ្លែងសុន្ទរកថាគន្លឹះ នៅឯកិច្ចប្រជុំនោះ លោក ស៊ី បានបញ្ជាក់ថា ការកសាងកិច្ចប្រឹងប្រែងរួមគ្នា ក្នុងរយៈពេលប៉ុន្មានឆ្នាំមកនេះ ប្រទេសចិន និងបណ្តាប្រទេសអាស៊ីកណ្តាល បានបង្កើតនូវស្មារតីចិន-អាស៊ីកណ្តាលនៃ «ការគោរពគ្នាទៅវិញទៅមក ការជឿទុកចិត្តគ្នា ការផ្ដល់ផលប្រយោជន៍ឲ្យគ្នាទៅវិញទៅមក និងការជួយគ្នាទៅវិញទៅមក ដើម្បីបន្តជំរុញកិច្ចប្រឹងប្រែងរួមគ្នា ចំពោះការធ្វើទំនើបកម្ម តាមរយៈការអភិវឌ្ឍប្រកបដោយគុណភាពខ្ពស់» ដោយលោកបានកត់សម្គាល់ថា ស្មារតីនេះដើរតួជាគោលការណ៍ណែនាំដ៏សំខាន់ ដើម្បីបន្តឆ្ពោះទៅការមានទំនាក់ទំនងមិត្តភាព និងកិច្ចសហប្រតិបត្តិការយូរអង្វែង ពីមួយជំនាន់ ទៅមួយជំនាន់។

នៅចុងបញ្ចប់នៃសុន្ទរកថា លោក ស៊ី បានសង្កត់ធ្ងន់ថា មិនថាពិភពលោកនេះប្រែប្រួលយ៉ាងណានោះទេ ប្រទេសចិននឹងបន្តធ្វើការជាមួយប្រទេសដទៃទៀត ហើយនឹងបន្តកិច្ចសហប្រតិបត្តិការដ៏រឹងមាំជាមួយអាស៊ីកណ្តាល ដើម្បីរីកចម្រើនជាមួយគ្នា និងចែករំលែកផលប្រយោជន៍ឲ្យគ្នាទៅវិញទៅមក៕