ទិន្នន័យ នៅថ្ងៃពុធ (ទី១៨ ខែមិថុនា) នេះ បានបង្ហាញថា ការនាំចេញរថយន្តរបស់ជប៉ុនទៅកាន់សហរដ្ឋអាមេរិក បានធ្លាក់ចុះស្ទើរតែ ១ភាគ៤ ក្នុងខែឧសភា ខណៈដែលក្ដីបារម្ភ អំពីវិធានការពន្ធរបស់លោក Donald Trump បន្តកើនឡើងឥតថមថយ ដោយកិច្ចព្រមព្រៀង រវាងទីក្រុងតូក្យូ និងទីក្រុងវ៉ាស៊ីនតោន មិនទាន់កើតមាននៅឡើយទេ។

ការងារប្រហែល ៨ភាគរយ ត្រូវបានផ្សារភ្ជាប់ទៅនឹងឧស្សាហកម្មរថយន្ត នៅក្នុងប្រទេសជប៉ុន ជាទីតាំងរបស់ក្រុមហ៊ុនផលិតរថយន្តដែលលក់ដាច់ជាងគេបំផុតរបស់ពិភពលោក គឺ Toyota ក៏ដូចជា Honda, Nissan និងក្រុមហ៊ុនលំដាប់យក្សផ្សេងទៀត។

ប្រទេសនេះកំពុងប្រឹងប្រែងឲ្យទទួលបានការបន្ធូរបន្ថយកម្រិតពន្ធលើរថយន្ត ២៥ភាគរយរបស់អាមេរិក និងកាតព្វកិច្ចពន្ធលើពាណិជ្ជកម្មផ្សេងទៀត ប៉ុន្តែមកទល់ពេលនេះ មិនទាន់មានកិច្ចព្រមព្រៀងណាមួយ ត្រូវបានសម្រេចនៅឡើយទេ ទោះមានការពិភាក្សាជាច្រើនជុំជាមួយលោក Trump និងរដ្ឋបាលរបស់លោកក៏ដោយ។

ជប៉ុនបានប្រកាសឱនភាពពាណិជ្ជកម្ម សម្រាប់រយៈពេល ២ខែជាប់គ្នា ក្នុងខែឧសភា ដោយការនាំចូលលើសពីតម្លៃនៃការនាំចេញចំនួន ៦៣៧,៦ពាន់លានយ៉េន (៤,៤ពាន់លានដុល្លារ)។ ហើយទិន្នន័យរបស់ក្រសួងហិរញ្ញវត្ថុ បានបង្ហាញថា សម្រាប់សហរដ្ឋអាមេរិក ជាពិសេសការនាំចេញ បានធ្លាក់ចុះប្រហែល ១១ភាគរយ ដោយការនាំចេញរថយន្ត បានធ្លាក់ ២៤,៧ភាគរយ ធៀបនឹងឆ្នាំមុន។

នៅប្រទេសកាណាដា បន្ទាប់ពីកិច្ចប្រជុំកំពូលនៃក្រុមប្រទេសមានឧស្សាហកម្មឈានមុខគេទាំង៧ ឬ G7 លោកនាយករដ្ឋមន្ត្រី Shigeru Ishiba បានប្រាប់អ្នកសារព័ត៌មានថា៖ «អត្រាពន្ធជាបន្តបន្ទាប់ដាក់ដោយសហរដ្ឋអាមេរិក ដែលតំណាងឲ្យប្រហែល ១ភាគ៤ នៃផលិតផលក្នុងស្រុកសរុបពិភពលោក និងប្រហែល ២០ភាគរយនៃការនាំចេញរបស់ប្រទេសជប៉ុន កំពុងប៉ះពាល់ដល់ប្រាក់ចំណេញរបស់ក្រុមហ៊ុនជប៉ុនជាច្រើន»។

លោកបានព្រមានថា ស្ថានភាព «អាចជះឥទ្ធិពលធ្ងន់ធ្ងរដល់ទាំងជប៉ុន និងសហរដ្ឋអាមេរិក ព្រមទាំងសេដ្ឋកិច្ចពិភពលោក ដោយផ្ទាល់ និងដោយប្រយោល»។ លោក Ishiba បានជួបពិភាក្សាទល់មុខជាមួយលោក Trump កាលពីថ្ងៃចន្ទ ប៉ុន្តែមិនមានការទម្លាយភាពទាល់ច្រក ជុំវិញបញ្ហាពាណិជ្ជកម្ម ត្រូវបានប្រកាសឡើងនោះឡើយ៕