នាយករដ្ឋមន្ត្រីអូស្ត្រាលី លោក Anthony Albanese នៅថ្ងៃពុធ (ទី១៨ ខែមិថុនា) នេះ បានប្រាប់ថា ប្រទេសរបស់លោក នឹងចាប់ផ្តើមការចរចាលើភាពជាដៃគូសន្តិសុខ និងការពារជាតិជាមួយសហភាពអឺរ៉ុប (EU) ហើយក៏សង្ឃឹមផងដែរ ពីការមានកិច្ចព្រមព្រៀងពាណិជ្ជកម្ម «សំខាន់ៗជានិមិត្តរូប»។

លោក Albanese បានជួបជាមួយប្រធានគណៈកម្មការអឺរ៉ុប លោកស្រី Ursula von der Leyen និងប្រធានក្រុមប្រឹក្សាអឺរ៉ុប លោក Antonio Costa នៅក្រៅកិច្ចប្រជុំកំពូលនៃក្រុមប្រទេសមានឧស្សហកម្មឈានមុខគេទាំង៧ (G7) ជាទីដែលឥស្សរជនទាំងអស់ បានពិភាក្សាអំពីសំណើរបស់ EU សម្រាប់ភាពជាដៃគូការពារជាតិ ដែលមន្ត្រីអូស្ត្រាលី បានពន្យល់ថា មិនមានកាតព្វកិច្ចដាក់ពង្រាយយោធា។

អំឡុងសន្និសីទសារព័ត៌មាន នៅទីក្រុង Kananaskis ជាកន្លែងដែលលោកកំពុងចូលរួមកិច្ចប្រជុំ G7 លោក Albanese បានប្រាប់ថា៖ «យើងមើលឃើញថា នេះជាក្របខ័ណ្ឌដ៏សំខាន់មួយ សម្រាប់កិច្ចសហប្រតិបត្តិការនាពេលបច្ចុប្បន្ន និងអនាគតរបស់យើង នៅក្នុងវិស័យនានា ដូចជាឧស្សាហកម្មការពារជាតិ អ៊ីនធឺណិត និងការប្រឆាំងភេរវកម្ម»។

លោក Albanese បានបញ្ជាក់ថា រដ្ឋមន្ត្រីមកពីភាគីទាំង២ នឹងដំណើរការកិច្ចចរចា នៅប៉ុន្មានសប្តាហ៍ខាងមុខ ដោយបន្ថែមថា លោករំពឹងថា ការពិភាក្សានឹងត្រូវបានបញ្ចប់ «យ៉ាងរហ័ស»។

ក្រោយមក លោកបានឲ្យដឹងនៅក្នុងសេចក្តីថ្លែងការណ៍ថា ភាពជាដៃគូនេះអាចឃើញឱកាសនៃលទ្ធកម្មការពារជាតិរួមគ្នា ដែលផ្តល់អត្ថប្រយោជន៍ដល់ឧស្សាហកម្ម ហើយបានបង្ហាញពី «ទំនាក់ទំនងយ៉ាងជ្រាលជ្រៅនៃសន្តិសុខរបស់អឺរ៉ុប និងតំបន់ឥណ្ឌូប៉ាស៊ីហ្វិក»៕