ឯកអគ្គរដ្ឋទូតអ៊ីរ៉ង់ប្រចាំអង្គការសហប្រជាជាតិនៅទីក្រុងហ្សឺណែវ បាននិយាយនៅថ្ងៃពុធនេះថា អ៊ីរ៉ង់បានបញ្ជូនទៅកាន់ទីក្រុងវ៉ាស៊ីនតោនថា ខ្លួននឹងឆ្លើយតបយ៉ាងម៉ឺងម៉ាត់ ចំពោះសហរដ្ឋអាមេរិក ប្រសិនបើខ្លួនចូលរួមដោយផ្ទាល់ នៅក្នុងយុទ្ធនាការយោធារបស់អ៊ីស្រាអែល។

លោក Ali Bahreini បានប្រាប់អ្នកសារព័ត៌មានថា លោកបានមើលឃើញសហរដ្ឋអាមេរិកថា ជា «ភាពស្មុកស្មាញ នៅក្នុងអ្វីដែលអ៊ីស្រាអែលកំពុងធ្វើ» ។ លោកបាននិយាយថា អ៊ីរ៉ង់នឹងកំណត់ខ្សែបន្ទាត់ក្រហម ហើយឆ្លើយតប ប្រសិនបើសហរដ្ឋអាមេរិកឆ្លងកាត់វានោះ ដោយមិនបានបញ្ជាក់ថាតើសកម្មភាពអ្វី នឹងបង្កជាការឆ្លើយតបនោះទេ។

អ៊ីស្រាអែលបានចាប់ផ្តើមសង្គ្រាមផ្លូវអាកាសកាលពីថ្ងៃសុក្រ បន្ទាប់ពីបាននិយាយថា ខ្លួនបានសន្និដ្ឋានថាអ៊ីរ៉ង់ជិតឈានដល់ការអភិវឌ្ឍអាវុធនុយក្លេអ៊ែរ។ អ៊ីរ៉ង់បដិសេធមិនស្វែងរកអាវុធនុយក្លេអ៊ែរ។ ប្រធានាធិបតីអាមេរិកលោក ដូណាល់ ត្រាំ កាលពីថ្ងៃអង្គារ បានអំពាវនាវឲ្យអ៊ីរ៉ង់ចុះចាញ់ដោយគ្មានលក្ខខណ្ឌ។

លោក Bahreini បានហៅការលើកឡើងរបស់លោក ត្រាំថា«គ្មានការធានា និងបង្កជាអរិភាពយ៉ាងខ្លាំង។ យើងមិនអាចព្រងើយកន្តើយបានទេ។ យើងមានការប្រុងប្រយ័ត្នចំពោះអ្វីដែលលោក ត្រាំ កំពុងនិយាយ។ យើងនឹងដាក់វានៅក្នុងការគណនា និងការវាយតម្លៃរបស់យើង»។