ការ៉ាតេ៖ ប្រតិភូ និងអត្តពលិកកីឡាការ៉ាតេកម្ពុជាបានត្រឡប់មកដល់មាតុភូមិវិញ ក្រោយបញ្ចប់ការប្រកួតជ្រើសរើសជើងឯកអាស៊ីលើកទី១៧ ឆ្នាំ២០២១ នៅប្រទេសកាហ្សាក់ស្ថានកាលពីចុងសប្ដាហ៍កន្លងទៅ ខណៈបេសកកម្មនេះបានទទួលជោគជ័យសំខាន់ៗ ២ ទី១-ការដណ្ដើមបានមេដាយសំរឹទ្ធកម្រិតអាស៊ី ២គ្រឿងលើកដំបូង និងទី២-អាជ្ញាកណ្ដាលកម្ពុជា ៥រូបបានប្រឡងជាប់អាជ្ញាកណ្ដាលកីឡាការ៉ាតេអន្ដរជាតិ។
ឯកឧត្តម វ៉ាត់ ចំរើន អគ្គលេខាធិការសហព័ន្ធកីឡាការ៉ាតេកម្ពុជា បានវាយតម្លៃខ្ពស់ចំពោះសមិទ្ធផលទទួលបានពីការប្រកួតជើងឯកអាស៊ីនេះ ដោយលោកថា ជោគជ័យនេះផ្ដើមចេញពីការបោះទុកវិនិយោគជួលគ្រូបរទេសកម្រិតខ្ពស់ មកបង្ហាត់របស់ថ្នាក់ដឹកនាំសហព័ន្ធ ។ ចំពោះការប្រឡងជាប់អាជ្ញាកណ្ដាលអន្ដរជាតិវិញ ក៏ជាសញ្ញាណមួយដ៏ល្អក្នុងយុទ្ធសាស្ដ្ររួមនៃភាពរីកចម្រើន របស់វិស័យកីឡាការ៉ាតេកម្ពុជាផងដែរ។ តាមរយៈនេះ ថ្នាក់ដឹកនាំសហព័ន្ធបានប្ដេជ្ញានឹងខិតខំថែរក្សា និងពង្រឹងបន្ថែមនូវការអភិវឌ្ឍ ទាំងធនធានកីឡាករ-កីឡាការិនីក៏ដូចជាអាជ្ញាកណ្ដាល ដើម្បីសម្រួចទិសដៅឆ្ពោះទៅរកភាពជោគជ័យនៅស៊ីហ្គេមឆ្នាំ២០២៣។ នេះបើតាមការគូសបញ្ជាក់របស់ឯកឧត្តម វ៉ាត់ ចំរើន។
សូមបញ្ជាក់ថា ការប្រកួតកីឡាការ៉ាតេជ្រើសរើសជើងឯកអាស៊ីលើកទី១៧ នៅប្រទេសកាហ្សាក់ស្ថានបានធ្វើការប្រកួតពីថ្ងៃទី១៩ ដល់ថ្ងៃទី២២ ខែធ្នូកន្លងទៅ ដោយមានអត្តពលិក ៤៥ប្រទេសចូលរួម ក្នុងនោះក្រៅពីប្រតិភូ និងអាជ្ញាកណ្ដាល កម្ពុជាក៏បានបញ្ជូនកីឡាករ-កីឡាការិនី ១៥នាក់ចូលរួមដែរ។ ជាលទ្ធផលកម្ពុជាដណ្ដើមបានមេដាយសំរឹទ្ធ ២គ្រឿងដោយកីឡាការិនី លឹម សុខវិច្ឆិកា លើវិញ្ញាសាយុវនារីទម្ងន់ក្រោម ៥៩គីឡូក្រាម និងកីឡាការិនី ឆន ស្រីភា លើវិញ្ញាសា U21 ទម្ងន់ក្រោម ៥៥គីឡូក្រាម៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
