មនុស្សរាប់ពាន់នាក់កំពុងភៀសខ្លួនចេញពីទីក្រុងតេអេរ៉ង់ នៅថ្ងៃពុធ (ទី១៨ ខែមិថុនា) នេះ បន្ទាប់ពីប្រធានាធិបតីអាមេរិក លោក Donald Trump បានប្រាប់ថា ពួកគេគួរតែចាកចេញពីរដ្ឋធានីនេះ ខណៈដែលប្រភពមួយ បានបង្ហើបថា លោក Trump កំពុងពិចារណាជម្រើសនានា ដែលរួមមានទាំងការចូលរួមជាមួយអ៊ីស្រាអែល ក្នុងការវាយប្រហារទីតាំងនុយក្លេអ៊ែរអ៊ីរ៉ង់។

គួរបញ្ជាក់ថា អ៊ីរ៉ង់ និងអ៊ីស្រាអែល បានបើកការវាយប្រហារថ្មីដោយមីស៊ីលតគ្នាទៅវិញទៅមក បន្ទាប់ពីលោក Trump អំពាវនាវឲ្យទីក្រុងតេអេរ៉ង់ព្រម «ចុះចាញ់ដោយគ្មានលក្ខខណ្ឌ!»។ អ៊ីស្រាអែលបានប្រាប់អ្នកស្រុក នៅតំបន់ភាគនិរតីនៃទីក្រុងតេអេរ៉ង់ឲ្យជម្លៀសចេញ ពីព្រោះកម្លាំងទ័ពអាកាសរបស់ខ្លួន អាចវាយប្រហារទីតាំងយោធាអ៊ីរ៉ង់។ ប្រព័ន្ធផ្សព្វផ្សាយអ៊ីរ៉ង់ បានរាយការណ៍ថា មានការធ្វើចរាចរណ៍យ៉ាងមមាញឹកលើផ្លូវដែលចេញពីរដ្ឋធានីឆ្ពោះទៅខេត្តភាគខាងជើង។

អាជ្ញាធរបានដាក់កម្រិតលើចំនួនប្រេងឥន្ធនៈដែលអាចទិញបាន។ រដ្ឋមន្ត្រីប្រេង លោក Mohsen Paknejad បានប្រាប់ទូរទស្សន៍រដ្ឋថា ការដាក់កំហិត គឺធ្វើឡើងដើម្បីការពារកង្វះខាត ប៉ុន្តែនឹងមិនមានបញ្ហា ក្នុងការផ្គត់ផ្គង់ប្រេងឥន្ធនៈដល់សាធារណជននោះទេ។

នៅអ៊ីស្រាអែល ការផ្ទុះត្រូវបានឮនៅទីក្រុង Tel Aviv។ ហើយយោធាបានប្រាប់ថា មីស៊ីល ២គ្រាប់របស់អ៊ីរ៉ង់ ត្រូវបានបាញ់សំដៅទៅកាន់ដែនដីអ៊ីស្រាអែល នាព្រឹកព្រលឹមថ្ងៃពុធ។

ការរំពឹងទុកដែលសហរដ្ឋអាមេរិកអាចចូលរួមក្នុងសង្គ្រាមនេះ បានធ្វើឲ្យទីផ្សារអន្តរជាតិច្របូកច្របល់។ អ៊ីស្រាអែលលើកឡើងថា គោលបំណងសំខាន់របស់ខ្លួន គឺបំផ្លាញកម្មវិធីនុយក្លេអ៊ែររបស់អ៊ីរ៉ង់ ប៉ុន្តែរោងចក្រចម្រាញ់នុយក្លេអែររបស់អ៊ីរ៉ង់ នៅ Fordow ត្រូវបានសាងសង់កប់យ៉ាងជ្រៅនៅក្រោមភ្នំ ដែលមានតែគ្រាប់បែកដ៏ធំរបស់អាមេរិកប៉ុណ្ណោះ ទើបអាចវាយប្រហារវាបាន៕