នៅថ្ងៃពុធ (ទី១៨ ខែមិថុនា ឆ្នាំ២០២៥) នេះ មេដឹកនាំកំពូលរបស់អ៊ីរ៉ង់ លោក Ali Khamenei បានប្តេជ្ញាថា ប្រទេសរបស់លោកនឹងមិនបង្ហាញនូវការមានក្តីមេត្តានោះឡើយ ចំពោះមេដឹកនាំរបស់អ៊ីស្រាអែល ដោយការលើកឡើងនេះ កើតមានក្រោយប៉ុន្មានម៉ោងបន្ទាប់ពីប្រធានាធិបតីអាមេរិក លោក Donald Trump បានទាមទារឲ្យទីក្រុងតេអេរ៉ង់ «ចុះចាញ់ដោយគ្មានលក្ខខណ្ឌ»។

តាមរយៈការបង្ហោះសារ នៅលើបណ្ដាញសង្គម X លោក Khamenei បានសរសេរថា៖ «យើងត្រូវតែផ្តល់ការឆ្លើយតបយ៉ាងខ្លាំងក្លា ចំពោះភេរវករ គឺរបបគាំទ្រលទ្ធិហ្សាអឺន។ យើងនឹងមិនបង្ហាញក្ដីមេត្តា ចំពោះពួកគាំទ្រលទ្ធិហ្សាអឺនជាដាច់ខាត»។

គួរបញ្ជាក់ថា អ៊ីស្រាអែលកាលពីសប្តាហ៍មុន បានចាប់ផ្តើមយុទ្ធនាការទម្លាក់គ្រាប់បែកមិនធ្លាប់មានពីមុនមក ដោយវាយប្រហារលើទីតាំងនុយក្លេអ៊ែរ និងយោធារបស់អ៊ីរ៉ង់ ក៏ដូចជាតំបន់លំនៅឋានផងដែរ។

អ៊ីរ៉ង់បានឆ្លើយតបដោយការបាញ់មីស៊ីល និងយានដ្រូន ហើយនៅព្រឹកថ្ងៃពុធនេះ បានប្រាប់ថា ខ្លួនបានបាញ់មីស៊ីលល្បឿនលឿនជាងសំឡេងសំដៅទៅដែនដីអ៊ីស្រាអែល។

កាលពីថ្ងៃអង្គារ លោក Trump បានទាមទារឲ្យមាន «ការព្រមចុះចាញ់ដោយគ្មានលក្ខខណ្ឌ» ពីសាធារណរដ្ឋឥស្លាម ហើយបាននិយាយដោយអំនួតថា សហរដ្ឋអាមេរិកអាចធ្វើឃាត លោក Khamenei ដោយមិនលំបាកនោះឡើយ៕