នៅថ្ងៃពុធ (ទី១៨ ខែមិថុនា) អនុរដ្ឋមន្ត្រីការបរទេសរុស្ស៊ី លោក Sergei Ryabkov បានព្រមានថា ការជួយផ្នែកយោធាដោយផ្ទាល់របស់សហរដ្ឋអាមេរិកដល់អ៊ីស្រាអែល អាចធ្វើឲ្យស្ថានការណ៍នៅតំបន់មជ្ឈិមបូព៌ាមានអស្ថិរភាពខ្លាំងឡើងៗ ជាទីដែលសង្រ្គាមផ្លូវអាកាស រវាងអ៊ីរ៉ង់ និងអ៊ីស្រាអែលបានផ្ទុះឡើងរយៈពេល ៦ថ្ងៃហើយ។

នៅក្នុងការអត្ថាធិប្បាយដាច់ដោយឡែក ប្រធានទីភា្នក់ងារចារកម្មបរទេស SVR របស់រុស្ស៊ី លោក Sergei Naryshkin ត្រូវបានដកស្រង់សម្តី ដែលបាននិយាយថា ស្ថានភាព រវាងអ៊ីរ៉ង់ និងអ៊ីស្រាអែល ឥឡូវនេះមានសភាពកាន់តែធ្ងន់ធ្ងរហើយ។

បើយោងតាមទីភ្នាក់ងារព័ត៌មាន Interfax របស់រុស្ស៊ី បានឲ្យដឹងថា លោក Ryabkov បានព្រមានសហរដ្ឋអាមេរិកកុំឲ្យឲ្យផ្ដល់ជំនួយផ្នែកយោធាដោយផ្ទាល់ដល់អ៊ីស្រាអែល ឬកុំសូម្បីតែពិចារណនូវ «លទ្ធភាពនៃការមានជម្រើស» បែបនេះ។ សារព័ត៌មានបានដកស្រង់សម្តីរបស់លោកដែលនិយាយថា៖ «ការធ្វើបែបនេះនឹងជាជំហានមួយដែលនឹងធ្វើឲ្យស្ថានការណ៍ទាំងមូលមានអស្ថិរភាពខ្លាំងឡើងៗ»។

គួរបញ្ជាក់ថា នៅមុនណេះ ប្រភពដែលដឹងពីការពិភាក្សាផ្ទៃក្នុងរបស់សហរដ្ឋអាមេរិក បានបង្ហើបឲ្យដឹងថា លោកប្រធានាធិបតី Donald Trump និងក្រុមរបស់លោក កំពុងពិចារណាជម្រើសមួយចំនួន ក្នុងនោះរួមទាំងការចូលរួមជាមួយអ៊ីស្រាអែល ក្នុងការវាយប្រហារលើទីតាំងនុយក្លេអ៊ែរអ៊ីរ៉ង់ផងដែរ៕