អ៊ីរ៉ងបានព្រមានថា រាល់ការអន្តរាគមន៍ណាមួយរបស់សហរដ្ឋអាមេរិកក្នុងជម្លោះជាមួយអ៊ីស្រាអែល នឹងក្លាយជាហានិភ័យនៃសង្រ្គាមពេញបន្ទុក ស្របពេលដែលភាគីទាំង ២បើកការវាយប្រហារគ្នាទៅវិញទៅមក សម្រាប់ថ្ងៃទី ៦ ។

នៅក្នុងបទសម្ភាសន៍ជាមួយកាសែត Al Jazeera នាថ្ងៃពុធនេះ អ្នកនាំពាក្យក្រសួងការបរទេសអ៊ីរ៉ង់លោក Esmaeil Baghaei បានព្រមានថា រាល់ការអន្តរាគមន៍ណាមួយរបស់អាមេរិក នឹងបណ្តាលឲ្យកើតមានសង្រ្គាមពេញបន្ទុកក្នុងតំបន់ ។

លោកបន្តថា ពួកយើងមាននូវទំនាក់ទំនងល្អខ្លាំងណាស់ជាមួយបណ្តាប្រទេសអារ៉ាប់ ហើយពួកគេដឹងច្បាស់ណាស់ការពិតដែលថា អ៊ីស្រាអែលកំពុងព្យាយាមអូសទាញអ្នកផ្សេងឲ្យធ្លាក់ចូលក្នុងសង្រ្គាម ។ ពួកយើងប្រាកដណាស់ថា ប្រទេសអារ៉ាប់ដែលមានមូលដ្ឋានទ័ពសហរដ្ឋអាមេរិក នឹងមិនអនុញ្ញាតឲ្យដែនដីរបស់ពួកគេត្រូវបានប្រើប្រាស់ប្រឆាំងនឹងប្រទេសមូស្លីមជិតខាងរបស់ពួកគេឡើយ ។

ប្រធានាធិបតីសហរដ្ឋអាមេរិកលោក Donald Trump ដែលកាលពីដំបូងឃ្លាត់ឆ្ងាយពីការវាយប្រហាររបស់អ៊ីស្រាអែល ចាប់តាំងពីពេលនោះមក បាននិយាយបង្ហើបឲ្យដឹងពីការជាប់ពាក់ព័ន្ធរបស់អាមេរិកនៅក្នុងជម្លោះ ដោយលោកនិយាយថា លោកចង់បានអ្វីមួយធំខ្លាំងជាងបទឈប់បាញ់ ។ 

សហរដ្ឋអាមេរិកបានបញ្ជូនយន្តហោះចម្បាំងទៅកាន់តំបន់មួយនេះ ហើយនិងបញ្ជូននាវាដដឹកយន្តហោះចម្បាំង USS Nimitz ផងដែរ ។ ទាហានអាមេរិករាប់ពាន់នាក់ឈរជើងនៅក្នុងប្រទេសជិតខាងស្ថិតក្នុងរយៈចម្ងាយអាវុធអ៊ីរ៉ង់ ។ 

ទោះបីជាយ៉ាងណាក៏ដោយ សហរដ្ឋអាមេរិកបានគំរាមឆ្លើយតបទ្រង់ទ្រាយធំ ចំពោះការវាយប្រហារណាមួយ ហើយកាលពីថ្ងៃអង្គារម្សិលមិញ លោក Trumpបានទាមទារឲ្យអ៊ីរ៉ង់ចុះចាញ់ដោយគ្មានលក្ខខណ្ឌ ៕