ប្រធានាធិបតីអ៊ុយក្រែនលោក Volodymyr Zelenskiy បានចាកចេញពីកិច្ចប្រជុំកំពូលប្រទេសមានឧស្សាហកម្មរីកលូតលាស់ G7 ដោយលោកនិយាយថា វិស័យការទូតស្ថិតក្នុងវិបត្តិ ដោយសារខកខានឱកាសជំរុញប្រធានាធិបតីសហរដ្ឋអាមេរិកលោក Donald Trump ឲ្យផ្តល់អាវុធបន្ថែមទៀត ។

នាយករដ្ឋមន្រ្តីកាណាដាលោក Mark Carney ដែលជាម្ចាស់ផ្ទះកិច្ចប្រជុំកំពូលនេះ បានប្រកាសនូកញ្ចប់ជំនួយថ្មីគាំទ្រអ៊ុយក្រែន ។ 

លោកនិយាយថា ពួកយើងនឹងបញ្ជូនប្រាក់ជាង ២ពាន់លានដុល្លារ ក្នុងការផ្តល់មូលនិធិសម្រាប់យានដ្រូន គ្រាប់រំសេវ និងរថពាសដែក ។

ប៉ុន្តែប្រទេសអ្នកមាន G7ពិបាកស្វែងការរួបរួមជុំវិញជម្លោះនៅអ៊ុយក្រែន ស្របពេលដែលលោក Trump បង្ហាញការគាំទ្រដល់ប្រធានាធិបតីរុស្ស៊ីលោក Vladimir Putin និងបានចាកចេញទៅមុន ១ថ្ងៃ ដើម្បីនិយាយពីជម្លោះអ៊ីស្រាអែល-អ៊ីរ៉ង ពីទីក្រុងវ៉ាស៊ីនតោន ។

លោក Zelenskiy និយាយថា លោកសង្ឃឹមថា បានជជែកគ្នាជាមួយលោក Trump ពីការទទួលបានអាវុធបន្ថែមទៀត ។

នៅលើបណ្តាញព័ត៌មានសង្គម Telegram លោក Zelenskiy និយាយថា វិស័យការទូតបច្ចុប្បន្នស្ថិតក្នុងវិបត្តិ ហើយក្រុមមេដឹកនាំ G7ត្រូវការបន្តអំពាវនាវលោក Trumpឲ្យប្រើប្រាស់ឥទ្ធិពលពិតប្រាកដរបស់លោក បង្ខំឲ្យបញ្ចប់សង្រ្គាម ។

ស្របពេលដែលកាណាដាស្ថិតនៅក្នុងចំណោមអ្នកការពារអ៊ុយក្រែនខ្លាំងបំផុត សមត្ថភាពរបស់ពួកគេក្នុងការជួយទីក្រុងគីវ នៅឆ្ងាយដាច់ពីសហរដ្ឋអាមេរិក ដែលជាអ្នកផ្គត់ផ្គងអាវុធធំបំផុតរបស់ពួកគេ ៕