រដ្ឋមន្ត្រីការបរទេសអាល្លឺម៉ង់ បានអំពាវនាវដល់មេដឹកនាំអ៊ីរ៉ង់ផ្ដល់នូវការធានាដ៏គួរឲ្យទុកចិត្តបានថា ខ្លួនមិនប្រឹងប្រែងផលិតអាវុធនុយក្លេអ៊ែរនោះឡើយ ហើយបង្ហាញថា ខ្លួនមានឆន្ទៈក្នុងការស្វែងរកដំណោះស្រាយតាមការចរចារ ខណៈដែលមានការភ័យខ្លាចខ្លាំងឡើងៗ ដែលថា ភាពតានតឹងផ្នែកយោធា រវាងអ៊ីរ៉ង់ និងអ៊ីស្រាអែល នឹងកើនឡើងខ្លាំងទៅៗ។

នៅឯសន្និសីទសារព័ត៌មានជាមួយសមភាគីហ្សកដានី នាថ្ងៃពុធ (ទី១៨ ខែមិថុនា) នេះ លោក Johann Wadephul បានលើកឡើងថា៖ «យើងនៅតែត្រៀមខ្លួនរួចជាស្រេច ដើម្បីចរចារកដំណោះស្រាយ។ តែទោះអ៊ីរ៉ង់ត្រូវតែចាត់វិធានការជាបន្ទាន់។ វាមិនយឺតពេលនោះទេ ក្នុងការចូលទៅកាន់តុចរចា ប្រសិនបើការចរចាលេចឡើងដោយចេតនាស្មោះត្រង់»។

ជាមួយគ្នានេះ លោក Wadephul បាននិយាយថា ការភ័យខ្លាចរបស់អ៊ីស្រាអែល ដែលថា អ៊ីរ៉ង់នឹងផលិតអាវុធនុយក្លេអ៊ែរ គឺជារឿងត្រឹមត្រូវ ហើយប្រទេសនេះមានសិទ្ធិការពារខ្លួន។ លោកបានបញ្ជាក់ថា៖ «ការសម្រេចចិត្តរបស់អ៊ីស្រាអែល ដើម្បីធ្វើអ្វីមួយប្រឆាំងនឹងការគំរាមកំហែងនេះ គឺជារឿងអាចយល់បាន»។ តែយ៉ាងណាក្ដី លោកបានបន្ថែមថា ការបាត់បង់អាយុជីវិតរបស់របស់ជនស៊ីវិលនៃភាគីទាំង២ គឺជាការសោកស្តាយ បន្ទាប់ពីមានការវាយប្រហារតាមផ្លូវអាកាស រវាងអ៊ីរ៉ង់ និងអ៊ីស្រាអែល។ 

លើសពីនេះទៀត លោកបានប្រាប់ថា ក្រសួងរបស់លោកកំពុងរៀបចំជើងហោះហើរពិសេស នៅយប់ថ្ងៃពុធ និងនៅថ្ងៃព្រហស្បតិ៍ ដើម្បីធ្វើមាតុភូមិនិវត្តន៍ជនជាតិអាល្លឺម៉ង់ តាមរយៈទីក្រុង Amman របស់ប្រទេសហ្សកដានី៕