ដេកលើពូកនៅស្ថានីយរថភ្លើងក្រោមដីស្ថិតក្នុងទីក្រុង Ramat Gan ប្រទេសអ៊ីស្រាអែល ពលរដ្ឋមួយចំនួនមានអារម្មណ៍ថា វាគឺជាកន្លែងសុវត្ថិភាពបំផុតសម្រាប់ពួកគេ និងមនុស្សជាទីស្រលាញ់របស់ពួកគេ អំឡុងការវាយប្រហារមីស៊ីលរបស់អ៊ីរ៉ង់ ។

អ៊ីស្រាអែល បានចាប់ផ្តើមសង្រ្គាមតាមច្រកអាកាសរបស់ពួកគេលើអ៊ីរ៉ង់កាលពីថ្ងៃសុក្រ ដោយមានគោលបំណងប្រឆាំងគម្រោងនុយក្លេអ៊ែរអ៊ីរ៉ង ។ ចាប់តាំងពីពេលនោះមក អ៊ីរ៉ង់ដែលច្រានចោលការស្វែងរកអាវុធនុយក្លេអ៊ែរ បានសងសឹកវិញដោយប្រើប្រាស់មីស៊ីល ។

សាលារៀន និងអគារធុរកិច្ចមិនចាំបាច់នៅទូទាំងអ៊ីស្រាអែល បន្តបិទទ្វារ ចាប់តាំងពីថ្ងៃសុក្ររហូតមក ស្របពេលស៊ីរ៉ែនវាយឆ្មក់តាមអាកាស បានបញ្ជូនដល់មនុស្សរាប់លាននាក់ ឲ្យរត់ទៅរកជម្រកការពារគ្រាប់បែក និងបន្ទប់សុវត្ថិភាព អំឡុងពេលថ្ងៃ និងពេលយប់ ។

នៅជុំវិញទីក្រុងរណបតែល អាវីវ ដែលជាមជ្ឈមណ្ឌពាណិជ្ជកម្មរបស់អ៊ីស្រាអែល ពលរដ្ឋមួយចំនួន បានស្វែងរកទីសុវត្ថិភាពនៅតាមស្ថានីយរថភ្លើងក្រោមដី ។

នៅស្ថានីយរថភ្លើងក្រោមដី Dankal ស្ថិតក្នុងទីក្រុង Ramat Gan ប្រជាពលរដ្ឋនាំគ្នាសម្រាកនៅលើពូកដែលផ្តល់ជូនដោយទីក្រុង ។

អ្នកស្រី Tamar Weiss ដែលបីកូនស្រីអាយុ ៤ខែនៅនឹងដៃ ដោយកូនប្រុសរបស់គាត់នៅក្បែរខ្លួននោះ និយាយថា គាត់មានអារម្មណ៍ភ័យខ្លាចខ្លាំងណាស់ ។ ជាពិសេសគាត់រស់នៅតំបន់មានមនុស្សច្រើនដែលអ៊ីរ៉ង់ទំនងជាកំណត់គោលដៅវាយប្រហារ ហើយទីក្រុងរបស់ពួកយើងមានអគារចាស់ទ្រុធទ្រោមច្រើនណាស់ ដោយគ្មានជម្រកសុវត្ថិភាពនោះទេ ។

បើទោះបីជាវាមិនងាយស្រួលនាំគ្រួសារតូចមួយនេះរបស់គាត់មកស្ថានីយរថភ្លើងក្រោមដីរាល់ល្ងាចពេលថ្ងៃលិចយ៉ាងណាក្តី អ្នកស្រី Weiss និយាយថា ស្ថានីយរថភ្លើងក្រោមដី គឺជាកន្លែងដែលគាត់យល់ឃើញថា មានសុវត្ថិភាពបំផុត ។

អ្នកស្រីបន្តថា គាត់បន់ឲ្យតែអ្នករាល់គ្នាមកទីនេះទេ ។ គាត់ចង់ឲ្យអ្នករាល់គ្នាមានកន្លែងដែលសុវត្ថិភាពនៅទីនេះ ៕