លទ្ធផលស្ទង់មតិដោយស្ថាប័ន Median នៅថ្ងៃពុធ ទី១៨ ខែមិថុនា) នេះ បានបង្ហាញថា គណបក្សប្រឆាំងដ៏ធំរបស់ហុងគ្រី គឺ Tisza បាននាំមុខ ១៥ពិន្ទុ លើបក្សកាន់អំណាច Fidesz របស់លោកនាយករដ្ឋមន្ត្រី Viktor Orban ក្នុងចំណោមអ្នកបោះឆ្នោតដែលបានសម្រេចចិត្តរួចហើយ ដោយបន្ថែមគម្លាត រវាងបក្សទាំង២ នៅមុនការបោះឆ្នោត នាឆ្នាំក្រោយ។

គណបក្សកណ្ដាល-ស្ដាំនិយម Tisza ដែលដឹកនាំដោយលោក Peter Magyar បង្កបញ្ហាប្រឈមផ្នេកនយោបាយធំបំផុត ចំពោះការគ្រប់គ្រងអំណាចរយៈពេល ១៥ឆ្នាំរបស់អ្នកជាតិនិយម លោក Orban ខណៈពេលដែលរដ្ឋាភិបាលរបស់លោកក៏កំពុងប្រឈមនឹងការលំបាកផ្នែកសេដ្ឋកិច្ចផងដែរ។

ទិន្នផលសេដ្ឋកិច្ចរបស់ហុងគ្រី មិនមានការប្រេប្រួលនោះឡើយ នៅក្នុងត្រីមាសទី១ ធៀបនឹងឆ្នាំមុន ខណៈដែលអតិផរណាស្ថិតក្នុងលំដាប់ខ្ពស់បំផុត នៅសហភាពអឺរ៉ុប (EU)។ ហើយជាមួយគ្នានេះ ការគំរាមកំហែងពីអត្រាពន្ធដ៏ខ្ពស់របស់សហរដ្ឋអាមេរិកលើការនាំចូលរបស់ EU ក៏អាចប៉ះពាល់យ៉ាងធ្ងន់ធ្ងរផងដែរដល់ក្ដីរំពឹងងើបរើឡើងវិញនៃសេដ្ឋកិច្ចរបស់ប្រទេសហុងគ្រី។

បើយោងតាមការស្ទង់មតិដែលចេញផ្សាយដោយសារព័ត៌មានក្នុងស្រុក HVG បានបង្ហាញឲ្យឃើញថា គណបក្សរបស់លោក Magyar ដែលទើបតែបានបង្កើតឡើងកាលពីឆ្នាំមុន ទទួលបានការគាំទ្រពីអ្នកបោះឆ្នោតចំនួន ៥១ភាគរយ ដែលបាននិយាយថា ពួកគេបានសម្រេចចិត្តរួចហើយថា ត្រូវគាំទ្រអ្នកណា ខណៈដែលអ្នកឆ្លើយតប ៣៦ភាគរយ បាននិយាយថា ពួកគេនឹងបោះឆ្នោតឲ្យបក្ស Fidesz។

ការស្ទង់មតិ បានបង្ហាញទៀតថា បក្ស Tisza មានប្រជាប្រិយភាពជាពិសេស ក្នុងចំណោមប្រជាជនវ័យក្មេង ដោយមានការគាំទ្រ ៥៨ភាគរយ ក្នុងចំណោមអ្នកមានអាយុក្រោម ៤០ឆ្នាំ ខណៈពេលដែលភាគច្រើននៃអ្នកដែលមានអាយុលើសពី ៥០ឆ្នាំ គាំទ្របក្ស Fidesz។ ភាគច្រើននៃអ្នកដែលត្រូវបានស្ទង់មតិ បានប្រាប់ថា ពួកគេរំពឹងថា បក្ស Tisza នឹងឈ្នះការបោះឆ្នោតបន្ទាប់៕