ក្រុមមន្ត្រីសុខាភិបាលហ្កាហ្សានិយាយថា ការវាយប្រហារដោយកាំភ្លើង និងតាមអាកាសរបស់អ៊ីស្រាអែលបានស្លាប់ពលរដ្ឋប៉ាឡេស្ទីយ៉ាងហោចណាស់១៤០នាក់នៅទូទាំងហ្កាហ្សាក្នុងពេល២៤ម៉ោងចុងក្រោយនេះ។   

  មន្ត្រីសុខាភិបាលប៉ាឡេស្ទីនបាននិយាយថា ប្រជាជនប៉ាឡេស្ទីនយ៉ាងហោចណាស់៧២នាក់ ត្រូវបានសម្លាប់ដោយការបាញ់រះរបស់អ៊ីស្រាអែលនៅទូទាំងតំបន់ហ្កាហ្សាចាប់តាំងពីព្រឹកព្រលឹម រួមទាំងមនុស្សចំនួន២៩នាក់ដែលកំពុងរង់ចាំរថយន្តជំនួយ ជាការសម្លាប់រង្គាលចុងក្រោយលើហ្វូងមនុស្សអស់សង្ឃឹមក្នុងការទទួលបានអាហារសម្រាប់គ្រួសារកំពុងស្រេកឃ្លានរបស់ពួកគេ។

ប្រភពវេជ្ជសាស្រ្តបានប្រាប់សារព័ត៌មាន Al Jazeera ថាឧបទ្ទវហេតុចុងក្រោយបំផុតនៃការសម្លាប់ប្រចាំថ្ងៃរបស់អ្នកស្វែងរកជំនួយប៉ាឡេស្ទីនក្នុងប៉ុន្មានសប្តាហ៍ថ្មីៗនេះ បានកើតឡើងកាលពីព្រឹកថ្ងៃពុធនៅលើផ្លូវ Salah al-Din ក្បែរច្រករបៀង Netzarim នៅកណ្តាលដែនដីហ្កាហ្សា។ ពួកគេបាននិយាយថា មនុស្សជាង១០០ នាក់ផ្សេងទៀតបានរងរបួសក្នុងការវាយប្រហារនេះ។

ប្រភពដដែលបន្តថាក្នុងការវាយប្រហារដ៏សាហាវផ្សេងទៀតរបស់អ៊ីស្រាអែលនៅទូទាំងតំបន់ហ្កាហ្សា មានមនុស្ស៨នាក់បានស្លាប់ និងមួយចំនួនផ្សេងទៀតបានរងរបួស ក្នុងការវាយប្រហារតាមអាកាសចំលើផ្ទះមួយកន្លែងក្នុងសង្កាត់ Zeitoun ភាគខាងត្បូងនៃទីក្រុងហ្កាហ្សា។ 

ប្រភពខាងលើបន្ថែមថា មនុស្ស៨នាក់ទៀតបានស្លាប់ និងមួយចំនួនផ្សេងទៀតបានរងរបួស ក្នុងការវាយប្រហាររបស់អ៊ីស្រាអែលលើតង់ជនភៀសខ្លួនក្នុងជំរំ al-Mawasi នៅភាគខាងត្បូងនៃដែនដីហ្កាហ្សា។

ទីភ្នាក់ងារសារព័ត៌មាននានាបានរាយការណ៍ថា ការវាយប្រហារតាមអាកាសមួយផ្សេងទៀតបានកើតឡើងលើជំរំ Maghazi នៅកណ្តាលហ្កាហ្សា។ ទីភ្នាក់ងារព័ត៌មានប៉ាឡេស្ទីន Wafa បានរាយការណ៍ថា មនុស្ស ១០ នាក់ រួមទាំងប្តី ប្រពន្ធ និងកូនៗ ក្នុងគ្រួសារតែមួយ ត្រូវបានសម្លាប់ក្នុងការវាយប្រហារនោះ។គួររម្លឹកថា ទាហានអ៊ីស្រាអែលបានសម្លាប់ជនជាតិប៉ាឡេស្ទីនយ៉ាងហោចណាស់ ៧០ នាក់ និងរបួសរាប់រយនាក់ ខណៈពួកគេស្វែងរកជំនួយនៅតំបន់ហ្កាហ្សាកាលពីថ្ងៃអង្គារសប្ដាហ៍នេះ ដោយបានបាញ់រះលើពួកគេដោយគ្រាប់កាំភ្លើងធំ កាំភ្លើងយន្ត និងយានដ្រូន៕