ទិន្នន័យបានបង្ហាញថា ការចំណាយលើថ្លៃសំបុត្រយន្តហោះ ឆ្លងកាត់សមុទ្រអាត្លង់ទិក បានធ្លាក់ចុះយ៉ាងគំហុក ដល់អត្រាដែលឃើញចុងក្រោយនៅមុនជំងឺរាតត្បាត ក្នុងសញ្ញាមិនល្អចុងក្រោយបង្អស់ដែលថា ប្រជាជនអឺរ៉ុបកាន់តែតិចជាងមុន កំពុងធ្វើដំណើរទៅកម្សាន្តនៅសហរដ្ឋអាមេរិក ដោយសារក្ដីបារម្ភអំពីការគ្រប់គ្រងព្រំដែនដ៏តឹងរ៉ឹងរបស់ប្រទេសនេះ និងគោលនយោបាយមិនទៀងទាត់របស់លោកប្រធានាធិបតី Donald Trump។

និន្នាការនេះអាចអូសបន្លាយដល់ និងលើសពីរយៈពេលវិស្សមកាលរដូវក្តៅ ដែលជាធម្មតាជាពេលវេលាដ៏មមាញឹកបំផុតសម្រាប់ក្រុមហ៊ុនអាកាសចរណ៍ និងក្រុមហ៊ុនទេសចរណ៍នានា។

ទិន្នន័យបឋមពីការិយាល័យធ្វើដំណើរ និងទេសចរណ៍ជាតិអាមេរិក នៅក្នុងក្រសួងពាណិជ្ជកម្មសហរដ្ឋអាមេរិក បានបង្ហាញថា ការមកដល់នៃភ្ញៀវបរទេសទៅកាន់អាមេរិក បានធ្លាក់ចុះ ២,៨% នៅក្នុងខែឧសភា ធៀបនឹងឆ្នាំមុន ហើយការធ្វើដំណើរពីអឺរ៉ុបខាងលិច បានថយចុះដល់ទៅ ៤,៤% នៅក្នុងខែឧសភា ដែលដឹកនាំដោយការធ្លាក់ចុះនៃអ្នកធ្វើដំណើរមកពីប្រទេសដាណឺម៉ាក និងអាល្លឺម៉ង់។

យោងតាមក្រុមហ៊ុនវិភាគផ្នែកអាកាសចរណ៍ OAG Aviation បានឱ្យដឹងថា អត្រាធ្លាក់ចុះជានិរន្តរភាពនៃការកក់ទុកមុន គឺស្របជាមួយនឹងការកក់សរុបទៅកាន់សហរដ្ឋអាមេរិក ក្នុងខែកក្កដា ដែលធ្លាក់ចុះ ១៣% ធៀបនឹងឆ្នាំមុន។

ការចំណាយថ្លៃសំបុត្រយន្តហោះឆ្លងកាត់អាត្លង់ទិកបានធ្លាក់ចុះចាប់តាំងពីត្រីមាសទី១មក នៅពេលដែលប្រជាជនអឺរ៉ុប ចាប់ផ្តើមពិចារណាឡើងវិញពីការធ្វើដំណើរទៅកាន់សហរដ្ឋអាមេរិក បន្ទាប់ពីលោក Trump ស្នើដាក់បញ្ចូលកោះហ្គ្រីនលែន បញ្ឆេះសង្រ្គាមពាណិជ្ជកម្មពិភពលោក និងចេញបញ្ជាឱ្យរឹតបន្តឹងគោលនយោបាយព្រំដែន៕